Aur Abu Hurairah razi Allahu anhu ne kaha ke mujhe Rasool Allah salla Allahu alaihi wasallam ne yeh wasiyat farmayi ke sone se pehle Witr parh liya karo .

Hum se Abu Nuaman ne byaan kiya , kaha ke hum se Hammad bin Zayd ne byaan kiya , kaha ke hum se Anas bin Sireen ne byaan kiya , kaha ke main ne Ibn Umar razi Allahu anhuma se poocha ke namaaz subah se pehle ki do rakaton ke mutalleq Aap ka kya khayal hai? Kya main in mein lambi qirat kar sakta hoon? Unhon ne farmaya ke Nabi Karim salla Allahu alaihi wasallam to raat ki namaaz (Tahajjud) do , do rakat kar ke parhte thay phir aik rakat parh kar in ko taaq bana laite aur subah ki namaaz se pehle ki do rakatein (Sunnat-e-Fajr to) is tarah parhte goya azaan (iqamat) ki aawaz Aap ke kaan mein par rahi hai . Hammad ki is se murad yeh hai ke Aap jaldi parh laite .

Hum se Umar bin Hafs bin Ghiyath ne byaan kiya , kaha ke mujh se mere baap ne byaan kiya , unhon ne kaha ke hum se A'mash ne byaan kiya , kaha ke mujh se Muslim bin Kaisan ne byaan kiya , in se Masrooq ne , in se Aisha razi Allahu anha ne farmaya ke Rasool Allah salla Allahu alaihi wasallam ne raat ke har hissa mein bhi Witr parhi hai aur aakhir mein Aap salla Allahu alaihi wasallam ka Witr subah ke qareeb pahuncha .