Hum se Musaddad bin Musarhad ne bayan kiya ke kaha hum se Bishr bin Mufaddal ne Ubaidullah bin Umar se , unhon ne Nafi se , unhon ne Abdullah bin Umar raziyallahu anhuma se ke ek shakhs ne Nabi Karim salla Allahu alaihi wa sallam se poocha jabke is waqt aap salla Allahu alaihi wa sallam minbar par thay ke raat ki namaz yani tahajjud kis tarah parhne ke liye aap farmate hain ? Aap salla Allahu alaihi wa sallam ne farmaya ke do do rakat kar ke parh aur jab subah qareeb hone lage to ek rakat parh lay . Yeh ek rakat is sari namaz ko taq bana de gi aur aap salla Allahu alaihi wa sallam farmaya karte thay ke raat ki aakhri namaz ko taq rakha karo kyunke Nabi Karim salla Allahu alaihi wa sallam ne is ka hukm diya .

Hum se Abul Numan Muhammad bin Fazl ne bayan kiya ke kaha hum se Hammad bin Zaid ne , unhon ne Ayyub Sakhtiyani se , unhon ne Ibn Umar raziyallahu anhuma se ke ek shakhs Nabi Karim salla Allahu alaihi wa sallam ki khidmat mein hazir hua . Aap salla Allahu alaihi wa sallam is waqt khutba de rahe thay aane wale ne poocha ke raat ki namaz kis tarah parhi jaye ? Aap salla Allahu alaihi wa sallam ne farmaya do do rakat phir jab tulu subah sadiq ka andesha ho to ek rakat witr ki parh lay taake tu ne jo namaz parhi hai isay yeh rakat taq bana de aur Imam Bukhari rahimahullah ne farmaya ke Waleed bin Kathir ne kaha ke mujh se Ubaidullah bin Abdullah Umri ne bayan kiya , Abdullah bin Umar raziyallahu anhuma ne un se bayan kiya ke ek shakhs ne Nabi Karim salla Allahu alaihi wa sallam ko awaz di jab ke aap salla Allahu alaihi wa sallam masjid mein tashreef farma thay .

Hum se Abdullah bin Yusuf ne bayan kiya ke kaha humein Imam Malik ne khabar di Ishaq bin Abdullah Ibn Abi Talha ke wastay se ke Aqeel bin Abi Talib ke ghulam Abu Murra ne unhein khabar di Abu Waqid Laithi Harith bin Awf sahaba ke wastay se , unhon ne bayan kiya ke Rasool Allah salla Allahu alaihi wa sallam masjid mein tashreef farma thay ke teen aadmi bahar se aaye . Do to Rasool Allah salla Allahu alaihi wa sallam ki majlis mein haziri ki gharz se aage barhe lekin teesra chala gaya . Un do mein se ek ne darmiyan mein khali jagah dekhi aur wahan baith gaya . Doosra shakhs peechay baith gaya aur teesra to wapas hi ja raha tha . Jab Rasool Allah salla Allahu alaihi wa sallam waz se farigh hue to aap salla Allahu alaihi wa sallam ne farmaya kya mein tumhein un teeno ke mutalliq ek baat na bataun . Ek shakhs to Allah ki taraf barha aur Allah ne isay jagah di yani pehla shakhs raha doosra to is ne logon mein ghusne se sharam ki , Allah ne bhi is se sharam ki , teesre ne munh pher liya . Is liye Allah ne bhi is ki taraf se munh pher liya .