Hum se Ali bin Abdullah bin Jafar ne bayan kiya , unhon ne kaha ke hum se Yahya bin Saeed Qattan ne bayan kiya , unhon ne kaha ke hum se Juaid bin Abdur Rahman ne bayan kiya , unhon ne kaha mujh se Yazid bin Khusaifa ne bayan kiya , unhon ne Saib bin Yazid se bayan kiya , unhon ne bayan kiya ke mein masjid Nabwi mein khara hua tha , kisi ne meri taraf kankri phenki . Mein ne jo nazar uthayi to dekha ke Umar bin Khattab raziyallahu anhu samne hain . Aap ne farmaya ke yeh samne jo do shakhs hain unhein mere pas bula kar lao . Mein bula laya . Aap ne poocha ke tumhara taluq kis qabeela se hai ya yeh farmaya ke tum kahan rehte ho ? Unhon ne bataya ke hum Taif ke rehne wale hain . Aap ne farmaya ke agar tum Madina ke hote to mein tumhein saza diye baghair na chhorta . Rasool Allah salla Allahu alaihi wa sallam ki masjid mein awaz unchi karte ho ?

Hum se Ahmad bin Saleh ne bayan kiya , unhon ne kaha ke hum se Abdullah bin Wahb ne bayan kiya , unhon ne kaha mujhe Yunus bin Yazid ne khabar di , unhon ne Ibn Shihab Zuhri ke wastay se bayan kiya , unhon ne kaha ke mujh se Abdullah bin Kab bin Malik ne bayan kiya , un ko un ke walid Kab bin Malik raziyallahu anhu ne khabar di ke unhon ne Abdullah Ibn Abi Hadrad raziyallahu anhu se apne ek qarz ke silsile mein Rasool Allah salla Allahu alaihi wa sallam ke daur mein masjid Nabwi ke andar talab kiya . Dono ki awaz kuch unchi ho gayi yahan tak ke Rasool Allah salla Allahu alaihi wa sallam ne bhi apne hijra se sun liya . Aap uthe aur hijra par pare hue parde ko hataya . Aap ne Kab bin Malik ko awaz di , aye Kab! Kab bole . Ya Rasool Allah! hazir hun . Aap ne apne hath ke ishare se bataya ke woh apna aadha qarz maaf kar de . Kab ne arz ki ya Rasool Allah! mein ne maaf kar diya . Aap ne Ibn Abi Hadrad se farmaya achha ab chal uth is ka qarz ada kar .