Hum se Abul Yaman ne byaan kiya , kaha ke humein Shuayb ne Zuhri se khabar di , kaha ke mujhe Salim bin Abdullah ne khabar di ke Abdullah bin Umar razi Allahu anhuma ne farmaya ek shakhs ne daryaft kiya ya Rasool Allah salla Allahu alaihi wasallam! Raat ki namaaz kis tarah parhi jaye ? Aap salla Allahu alaihi wasallam ne farmaya do , do rakat aur jab tulu subah hone ka andesha ho to ek rakat witr parh kar apni saari namaaz ko taaq bana le .

Hum se Musaddad ne byaan kiya , kaha ke hum se Yahya bin Saeed Qattan ne byaan kiya , un se Shubah ne kaha ke mujh se Abu Hamzah ne byaan kiya aur un se Ibn Abbas razi Allahu anhuma ne ke Nabi Karim salla Allahu alaihi wasallam ki raat ki namaaz terah rakat hoti thi .

Hum se Ishaq bin Rahwayh ne byaan kiya , kaha ke hum se Ubaydullah bin Musa ne byaan kiya , kaha ke humein Israeel ne khabar di , unhein Abu Husayn Uthman bin Asim ne , unhein Yahya bin Wathab ne , unhein Masrooq bin Ajda ne , Aap ne kaha ke mein ne Aisha Siddiqa razi Allahu anha se Nabi Karim salla Allahu alaihi wasallam ki raat ki namaaz ke mutaliq poocha to Aap ne farmaya ke Aap salla Allahu alaihi wasallam saat , nau aur gyarah tak rakatain parhte thay . Fajr ki sunnat is ke siwa hoti .

Hum se Ubaydullah bin Musa ne byaan kiya , kaha ke humein Hanzalah bin Abi Sufyan ne khabar di , unhein Qasim bin Muhammad ne aur unhein Aisha Siddiqa razi Allahu anha ne , Aap ne batlaya ke Nabi Karim salla Allahu alaihi wasallam raat ko terah rakatain parhte thay . Witr aur Fajr ki do sunnat rakatain isi mein hotain .