Hum se Abdullah bin Maslamah Qa'nabi ne byaan kiya , un se Imam Malik rahimahullah ne , un se Yahya bin Saeed ne , un se Amrah bint Abdur Rahman ne aur un se Nabi Karim salla Allahu alaihi wasallam ki zaujah mutahharah Ayesha razi Allahu anha ne ke aik Yahoodi aurat un ke paas mangne ke liye aayi aur us ne dua di ke Allah aap ko qabar ke azaab se bachaye . Ayesha razi Allahu anha ne Rasool Allah salla Allahu alaihi wasallam se poocha ke kya logon ko qabar mein azaab ho ga ? Is par Aap salla Allahu alaihi wasallam ne farmaya ke main Allah Ta'ala ki is se panah mangta hoon .

Hum se Ismail bin Abdullah bin Abi Owais ne byaan kiya , unhon ne kaha ke mujh se Imam Malik rahimahullah ne Yahya bin Saeed Ansari se byaan kiya , un se Amrah bint Abdur Rahman ne , un se Ayesha Siddiqa razi Allahu anha ne ke aik Yahoodi aurat un ke paas kuch mangne aayi . Us ne kaha ke aap ko Allah Ta'ala qabar ke azaab se bachaye , unhon ne Nabi Karim salla Allahu alaihi wasallam se poocha ke kya qabar mein bhi azaab ho ga ? Nabi Karim salla Allahu alaihi wasallam ne (yeh sun kar) farmaya ke main Allah ki is se panah mangta hoon .

Hum se Musaddad ne byaan kiya , un se Yahya ne un se Hisham ne un se un ke baap Urwah bin Zubayr ne un se Umm al-Mumineen Aisha razi Allahu anha ne ke Rasool Allah salla Allahu alaihi wasallam ko teen kapron mein kafan diya gaya tha jin mein na qamees thi aur na amama tha . Imam Abu Abdullah Bukhari rahimahullah farmate hain ke Abu Naeem ne lafz «thalathah» nahin kaha aur Abdullah bin Waleed ne Sufyan se lafz «thalathah» naqal kiya hai .

Hum se Usman bin Abi Shaybah ne bayan kiya, kaha hum se Jareer bin Abd-ul-Hameed ne bayan kiya, in se Abu Wail ne, in se Masrooq ne aur in se Aisha razi Allahu anha ne bayan kiya ke Madinah ke Yahudiyon ki do burhi auratein mere paas aayin aur unhon ne mujh se kaha ke qabr walon ko in ki qabr mein azab ho ga. Lekin main ne unhein jhutlaya aur in ki (baat ki) tasdeeq nahi kar saki. Phir woh donon auratein chali gayiein aur Nabi Karim salla Allahu alaihi wasallam tashreef laaye to main ne arz kiya: ya Rasool Allah! Do burhi auratein thien, phir main Aap se waqia ka zikr kiya. Nabi Karim salla Allahu alaihi wasallam ne farmaya ke unhon ne sahih kaha, qabr walon ko azab ho ga aur in ke azab ko tamam chaupaye sunein ge. Phir main ne dekha ke Nabi Karim salla Allahu alaihi wasallam har namaz mein qabr ke azab se Allah ki panah maangne lage thay.