Aur Allah Ta'ala ne (Surah Al-Juma) mein farmaya «fas'au ila zikrillahi» ke ”Allah ke zikr ki taraf tezi ke sath chalo“ aur us ki tafseer jis ne yeh kaha ke «sa'a» ke maani amal karna aur chalna jaise Surah Bani Israil mein hai «sa'a laha sa'yaha» yahan «sa'a» ke yahi maani hain . Ibn Abbas razi Allahu anhuma ne kaha ke khareed o farokht juma ki azaan hote hi haram ho jati hai Ata ne kaha ke tamam karobar us waqt haram ho jate hain . Ibrahim bin Saad ne Zuhri ka yeh qaul naqal kiya ke juma ke din jab muazzin azaan de to musafir bhi shirkat kare .

Hum se Ali bin Abdullah Madini ne byaan kiya , kaha ke hum se Waleed bin Muslim ne byaan kiya , kaha ke hum se Yazid bin Abi Maryam ne byaan kiya , kaha ke hum se Abayah bin Rifa'ah bin Rafi bin Khadeej ne byaan kiya , unhon ne byaan kiya ke main juma ke liye ja raha tha . Raaste mein Abu Abs razi Allahu anhu se meri mulaqat hui , unhon ne kaha ke main ne Rasool Allah salla Allahu alaihi wasallam se suna hai ke jis ke qadam Allah ki raah mein ghubaar aalood ho gaye Allah Ta'ala use dozakh par haram kar de ga .