Allah tabarak wa taala ka farmaan ”juma ke din jab namaaz ke liye azaan di jaye to tum Allah ki yaad ke liye chal kharay ho aur khareed o farokht chhor do ke yeh tumhare haq mein behtar hai agar tum kuch jaante ho“ . (aayat mein) «fasaw fil amdu» ke maani mein hai (yani chal kharay ho) .

Hum se Abul Yaman ne byaan kiya , kaha ke hamein Shoaib ne khabar di , kaha ke hum se Abuz Zinad ne byaan kiya , un se Rabiah bin Haarith ke ghulam Abdur Rahman bin Hurmuz Araj ne byaan kiya ke unhon ne Abu Hurayrah razi Allahu anhu se suna aur Aap razi Allahu anhu ne Nabi Karim salla Allahu alaihi wasallam se suna , Aap ne farmaya ke hum dunya mein tamam ummaton ke baad hone ke bawajood qiyamat mein sab se aage rahen ge farq sirf yeh hai ke kitaab unhein hum se pehle di gayi thi . Yahi (juma) un ka bhi din tha jo tum par farz hua hai . Lekin un ka is ke bare mein ikhtilaaf hua aur Allah Taala ne hamein yeh din bata diya is liye log is mein hamare tabi hon ge . Yahood doosre din hon ge aur Nasara teesre din .