Hum se Sa’eed bin ’Ufair ne bayan kiya, unhon ne kaha mujh se Laith ne, un se ’Aqeel ne Ibn-e-Shihaab ke waaste se naql kiya, woh Hamzah bin Abdullah bin Umar se naql karte hain ke Abdullah bin Umar Radhiallahu Anhuma ne farmaaya main ne Rasoolullah Sallallahu Alaihi Wasallam ko yeh farmaate huwe suna hai ke main so raha tha (usi haalat mein) mujhe doodh ka ek pyaala diya gaya. Main ne (khoob achchi tarah) pi liya. Hatta ke main ne dekha ke taazgi mere nakhunon se nikal rahi hai. Phir main ne apna bacha huwa (doodh) Umar bin Khattab ko de diya. Sahaba Radhiallahu Anhum ne poocha Aap ne us ki kiya ta’beer li? Aap Sallallahu Alaihi Wasallam ne farmaaya ilm.