Aur (Surah al-Toor mein) farmaya «wat-toori wa kitaabim-mastoorin» ”Aur Toor pahar ki qasam aur kitab ki qasam jo mastoor hai .“ Qatadah ne kaha «mastoorun» ke maani likhi gayi aur isi se hai «yasturoona» yani likhte hain . «fee um-mil-kitaabi» yani majmooi asl kitab mein , yeh jo Surah Qaaf mein farmaya «maa yal-fizhhu min qaulin» is ka maani yeh hai ke jo baat woh munh se nikaalta hai is ke naama e aamal mein likh di jaati hai aur Ibn Abbas raziAllahu anhuma ne kaha naiki aur badi yeh farishta likhta hai . «yuhar-rifoona» lafzhon ko apne thikanon se hata dete hain kyunke Allah ki kitab mein se koi lafzh bilkul nikaal daalna yeh kisi se nahi ho sakta magar is mein tahreef karte hain yani aise maani bayan karte hain jo is ke asli maani nahi hain . «wa in kin-naa an diraasatihime» mein «diraasatin» se tilawat murad hai . «waa-iyatun» jo Surah al-Haaq-qah mein hai yaad rakhne wala . «wa ta-iyahaa» yani yaad rakkhe aur yeh jo (Surah Yusuf mein hai) «wa oohiya ilay-ya haazhal-quraanu li-unzhirakum bi-hee» mein «kum» se khitab Makkah walon ko hai «wa mam-balagha» se doosre tamam jahan ke log in sab ko yeh Quran darane wala hai .

Imam Bukhari rahmahullah ne kaha mujh se Khaleefa bin Khay-yaat ne bayan kiya . Hamase Mutamir ne bayan kiya , kaha main ne apne walid Sulayman se suna , unhon ne Qatadah se , unhon ne Abu Rafi se , unhon ne Abu Hurairah razi Allahu anhuse , unhon ne Nabi Karim salla Allahu alaihi wasallam se , Aap salla Allahu alaihi wasallam ne farmaya ”Allah Ta'ala jab khalqat ka paida karna thehra chuka (ya jab khalqat paida kar chuka) to us ne arsh ke oopar apne paas ek kitab likh kar rakkhi is mein yun hai meri rahmat merey ghusse par ghalib hai ya merey ghusse se aage barh chuki hai .“