Aur kaun si gawahi is muqaddama mein jaiz hai aur kaun si na-jaiz aur hakim jo apne naibon ko parwane likhe. Isi tarah ek mulk ka qazi doosre mulk ke qazi ko, is ka bayan aur baaz logon ne kaha hakim jo parwane apne naibon ko likhe un par amal ho sakta hai. Magar hudood-e-shar'iya mein nahi ho sakta (kyunke darr hai ke parwana ja'li na ho) phir khud hi kehte hain ke qatl-e-khata mein parwane par amal ho sakta hai kyunke wo is ki raye par misl-e-maali dawoon ke hai halanke qatl-e-khata maali dawoon ki tarah nahi hai balki suboot ke baad is ki saza maali hoti hai to qatl-e-khata aur amad donon ka hukm ek rehna chahiye. (donon mein parwane ka aitibar na hona chahiye) aur Umar Radi Allahu Anhu ne apne aamiloon ko hudood mein parwane likhe hain aur Umar bin Abdul Aziz ne daant todne ke muqaddama mein parwana likha aur Ibrahim Nakha'i ne kaha ek qazi doosre qazi ke khat par amal kar le jab is ki mohr aur khat ko pehchanta ho to yeh jaiz hai aur Shabi mohri khat ko jo ek qazi ki taraf se aaye jaiz rakhte thay aur Abdullah bin Umar Radi Allahu Anhuma se bhi aisa hi manqool hai aur Muawiya bin Abdul Kareem Saqafi ne kaha mein Abdul Malik bin Ya'la (Basra ke qazi) aur Iyas bin Muawiya (Busra ke qazi) aur Hasan Basri aur Sumama bin Abdullah bin Anas aur Bilal bin Abi Burda (Busra ke qazi) aur Abdullah bin Buraida (Marw ke qazi) aur Aamir bin Ubaida (Kufa ke qazi) aur Abbad bin Mansoor (Busra ke qazi) in sab se mila hoon. Yeh sab ek qazi ka khat doosre qazi ke naam bagair gawahon ke manzoor karte. Agar fareeq-e-sani jis ko is khat se zarar hota hai yun kahe ke yeh khat ja'li hai to is ko hukm dein ge ke accha is ka suboot de aur qazi ke khat par sab se pehle Ibn Abi Laila (Kufa ke qazi) aur Sawar bin Abdullah (Busra ke qazi) ne gawahi chahi aur hum se Abu Nu'aim Fazl bin Dukain ne kaha, hum se Ubaidullah bin Muhriz ne bayan kiya ke mein ne Musa bin Anas Busra ke paas is mudda'i par gawah pesh kiye ke falan shakhs par mera itna haqq aata hai aur wo Kufa mein hai phir mein un ka khat le kar Qasim bin Abdur Rahman Kufa ke qazi ke paas aaya. Unhon ne is ko manzoor kiya aur Imam Hasan Basri aur Abu Qulaba ne kaha wasiyyat-nama par is waqt tak gawahi karna makrooh hai jab tak is ka mazmoon na samajh le aisa na ho wo zulm aur khilaf-e-shara ho. Aur Nabi Kareem صلی اللہ علیہ وسلم ne Khaibar ke Yahudiyoon ko khat bheja ke ya to is shakhs (yaani Abdullah bin Sahl) maqtool ki diyat do jo tumhari basti mein mara gaya hai warna jang ke liye tayyar ho jao. Aur Zuhri ne kaha agar aurat parde ki aad mein ho aur aawaz wagaira se to ise pehchanta ho to is par gawahi de sakta hai warna nahi.

`Mujh se Muhammad bin Bashar ne bayan kiya, kaha hum se Ghandar ne bayan kiya, un se Shu'ba ne bayan kiya, kaha ke mein ne Qatada se suna, un se Anas bin Malik Radi Allahu Anhu ne bayan kiya ke jab Nabi Kareem صلی اللہ علیہ وسلم ne ahl-e-Room ko khat likhna chaha to sahabah ne kaha ke Roomi sirf mohr laga hua khat hi qabool karte hain. Nabi Kareem صلی اللہ علیہ وسلم ne chandi ki ek mohr banwayi goya mein is ki chamak ko is waqt bhi dekh raha hoon aur is par kalima «Muhammad Rasulullah» naqsh tha.