Aur Abdullah bin Umar aur Zuhri aur Ibrahim Nakhai ne kaha murtad aurat qatl ki jaye. Is baab mein yeh bhi bayan hai ke murtadon se tauba li jaye aur Allah Ta'ala ne (Surah Aal e Imran) mein farmaya ”Allah Ta'ala aise logon ko kaise hidayat de ga jo iman la kar phir kafir ban gaye. Haalan-ke (pehle) yeh gawahi de chuke thay ke Muhammad (salla Allahu alaihi wasallam) sache Paighambar hain aur in ki paighambari ki khuli khuli daleelein in ke paas aa chukein aur Allah Ta'ala aise hat-dharm logon ko raah par nahi laata. In logon ki saza yeh hai ke in par Allah aur farishton ki aur sab logon ki phutkaar pare gi. Isi phutkaar ki wajah se azab mein hamesha pare rahein ge kabhi in ka azab halka na ho ga na unhein muhlat mile gi albatta jin logon ne aisa karne ke baad tauba ki apni halat durust kar li to Allah in ka qusoor bakhshne wala meherban hai. Beshak jo log iman laaye aur phir kafir ho gaye phir in ka kufr barhta gaya in ki to tauba bhi qabool na ho gi aur yahi log to (parey siray ke) gumrah hain“ aur farmaya ”Musalmano! Agar tum Ahl e Kitab ke kisi giroh ka kaha maano ge to woh iman laane ke baad tum ko kafir bana kar chhorrein ge“ aur Surah Nisa ke beesvein rukoo mein farmaya ”jo log Islam laaye phir kafir ban baithe phir Islam laaye phir kafir ban baithe phir kufr barhaate chale gaye un ko to Allah Ta'ala na bakhshe ga na kabhi unhein raah e raast par laaye ga“ aur Surah al-Maida ke aathvein rukoo mein farmaya ”jo koi tum mein se apne deen se phir jaye to Allah Ta'ala ko kuch parwa nahi woh aise logon ko hazir kar de ga jin ko woh chahta hai aur woh is ko chahte hain. Musalmanon par narm-dil kafiron par kare“ akheer aayat tak aur Surah al-Nahl choudhvein rukoo mein farmaya ”lekin jo log iman laaye aur دل khol kar yani khushi aur raghbat se kufr ikhtiyar karein in par to Allah ka ghazhab utre ga aur unhein bada azab ho ga is ki wajah yeh hai ke aise logon ne duniya ki zindagi ke mazon ko aakhirat se zyada pasand kiya aur yeh bhi hai ke Allah Ta'ala kafir logon ko raah par nahi laata. Yahi log to woh hain jin ke dilon aur kaanon aur aankhon par Allah ne mohar laga di hai woh Allah se bilkul ghafil ho gaye hain to aakhirat mein char o na-char yeh log khasara uthayein ge.“ Akheer aayat «inna rabbaka mim-ba-dihaa la-ghafoorur-raheemun» tak. Aur Surah al-Baqarah sattaisvein rukoo mein farmaya ”yeh kafir to sada tum se larte rahein ge jab tak in ka bas chale to woh apne deen se tum ko pher dein (murtad bana dein) aur tum mein jo log apne deen (Islam) se phir jayein aur marte waqt kafir marein in ke saare naik aamal duniya aur aakhirat mein gaye guzre. Woh dozakhi hain hamesha dozakh mein hi rahein ge.“ (Imam Bukhari rahmahullah ne yahan in sab aayat ko jama kar diya jo murtadon ke baare mein Quran Majeed mein aayi thien).

Hum se Abu al-Nu-man Muhammad bin Fadl Sadoosi ne bayan kiya, kaha hum se Hammad bin Zayd ne, unhon ne Ayub Sakhtiyani se, unhon ne Ikrimah se, unhon ne kaha Ali razi Allahu anhu ke paas kuch be-deen log laaye gaye. Aap ne un ko jalwa diya. Yeh khabar Ibn Abbas razi Allahu anhuma ko pahunchi to unhon ne kaha agar main hakim hota to unhein kabhi na jalwata (doosri tarah se saza deta) kyunke Nabi Karim salla Allahu alaihi wasallam ne aag mein jalane se mana farmaya hai. Aap salla Allahu alaihi wasallam ne farmaya ke aag Allah ka azab hai tum Allah ke azab se kisi ko mat azab do main unhein qatl karwa daalta kyunke Nabi Karim salla Allahu alaihi wasallam ne farmaya hai jo shakhs apna deen badal daale Islam se phir jaye is ko qatl kar daalo.