Hum se Abdul Aziz bin Abdullah ne byaan kiya , kaha ke hum se Ibrahim bin Saad ne apne baap Saad bin Ibrahim se byaan kiya , unhon ne Hafs bin Aasim se , unhon ne Abdullah bin Malik bin Buhaynah se , kaha ke Nabi Karim salla Allahu alaihi wasallam ka guzar ek shakhs par hua (doosri sanad) Imam Bukhari rahimahullah ne kaha ke mujh se Abdur Rahman bin Bishr ne byaan kiya , kaha ke hum se Bahz bin Asad ne byaan kiya . Kaha ke hum se Shubah ne byaan kiya , kaha ke mujhe Saad bin Ibrahim ne khabar di , kaha ke main ne Hafs bin Aasim se suna , kaha ke main ne qabeela Azd ke ek sahib se jin ka naam Malik bin Buhaynah razi Allahu anhu tha , suna ke Rasool Allah salla Allahu alaihi wasallam ki nazar ek aise namazi par pari jo takbeer ke baad do rakat namaaz parh raha tha . Nabi Karim salla Allahu alaihi wasallam jab namaaz se farigh ho gaye to log us shakhs ke ird gird jama ho gaye aur Nabi Karim salla Allahu alaihi wasallam ne farmaya kya subah ki chaar rakatein parhta hai ? Kya subah ki chaar rakatein ho gayeen ? Is hadees ki mutabaat Ghundar aur Muaz ne Shubah se ki hai jo Malik se riwayat karte hain . Ibn Ishaq ne Saad se , unhon ne Hafs se , woh Abdullah bin Buhaynah se aur Hammad ne kaha ke hamein Saad ne Hafs ke wastay se khabar di aur woh Malik ke wastay se .