Aur Allah Ta'ala ne farmaya «wa adal-lahu-laahu alaa ilmin» ”jaisa Allah ke ilm mein tha is ke mutabiq in ko gumrah kar diya .“ (Yeh tarjuma e baab khud ek hadees mein mazkoor hai jise Imam Ahmad aur Ibn Hibban ne nikala hai .) Aur Abu Hurairah razi Allahu anhu ne bayan kiya ke mujh se Nabi Karim salla Allahu alaihi wasallam ne farmaya ke jo kuch tumhare saath hone wala hai , is par qalam khushk ho chuka hai (woh likha ja chuka hai) Ibn Abbas razi Allahu anhuma ne «lahaa saabiqoona» ki tafseer mein farmaya ke naik-bakhti pehle hi in ke muqaddar mein likhi ja chuki hai .

Hum se Adam bin Abi Iyas ne bayan kiya , kaha hum se Shubah ne bayan kiya , kaha hum se Yazid Rishk ne bayan kiya , unhon ne Mutarrif bin Abdullah bin Shikh-kheer se suna , woh Imran bin Husain razi Allahu anhuma se bayan karte thay , unhon ne kaha ke ek sahab ne (yani khud unhon ne) arz kiya: ya Rasool Allah! Kya jannat ke log jahannumiyon mein se pehchane ja chuke hain . Nabi Karim salla Allahu alaihi wasallam ne farmaya ”haan“ unhon ne kaha ke phir amal karne wale kyun amal karein ? Nabi Karim salla Allahu alaihi wasallam ne farmaya ke har shakhs wahi amal karta hai jis ke liye woh paida kiya gaya hai ya jis ke liye usay sahoolat di gayi hai .