Hum se Maaz bin Asad Marwazi ne bayan kiya , kaha hum ko Abdullah bin Mubarak ne khabar di , kaha hum ko Yunus bin Yazid ne khabar di , in se Zuhri ne bayan kiya , kaha ke mujh se Saeed bin al-Musayyab ne bayan kiya aur in se Abu Hurairah razi Allahu anhu ne bayan kiya ke main ne Rasool Allah salla Allahu alaihi wasallam se suna , Nabi Karim salla Allahu alaihi wasallam ne farmaya ke meri ummat ki ek jama'at jannat mein dakhil ho gi jis ki tadaad sattar hazar ho gi . In ke chehre is tarah roshan hon ge jaise choudhvein raat ka chaand roshan hota hai . Abu Hurairah razi Allahu anhu ne bayan kiya ke is par Ukkashah bin Mihsan Asadi razi Allahu anhu khare huay , apni dhaari-daar kamli jo in ke jism par ku , uthate huay arz kiya: ya Rasool Allah! Allah Ta'ala se dua kijiye ke mujhe bhi in mein se kar de . Nabi Karim salla Allahu alaihi wasallam ne dua ki ke Ae Allah! Unhein bhi in mein se kar de . Is ke baad ek aur sahabi khare huay aur arz kiya: ya Rasool Allah! Dua kijiye ke Allah mujhe bhi in mein se kar de . Nabi Karim salla Allahu alaihi wasallam ne farmaya ke Ukkashah tum par sabqat le gaye .