Mujahid ne kaha ke «soor» ek seeng ki tarah hai . Aur (Surah Yaseen mein jo hai «fa-innamaa hiya zaj-ratuw-waahidatun») to «zaj-rah» ke maani cheekh ke hain (doosri baar) phoonkna aur «sayhah» pehli baar phoonkna . Aur Ibn Abbas ne kaha «naaqoor» (jo Surah al-Muddas-sir mein hai) «soor» ko kehte hain (wasalah-ul-Tabari wa Ibni Abi Hatim) «al-raajifah» (jo Surah al-Naaziaat mein hai) pehli baar soor ka phoonkna , «al-raadifah» (jo isi surat mein hai) doosri baar ka phoonkna .

Mujh se Abd-ul-Aziz bin Abdullah ne bayan kiya , unhon ne kaha ke mujh se Ibrahim bin Saad ne bayan kiya , in se Abu Salamah bin Abd-ur-Rahman ne aur Abd-ur-Rahman al-Aaraj ne bayan kiya , in donon ne bayan kiya ke Abu Hurairah razi Allahu anhu ne farmaya ke do aadmiyon ne aapas mein gaali-galouch ki . Jin mein se ek Musalman tha aur doosra Yahudi thu . Musalman ne kaha ke is Parvardigar ki qasam jis ne Muhammad salla Allahu alaihi wasallam ko tamam jahan par barguzida kiya . Yahudi ne kaha ke is Parvardigar ki qasam jis ne Musa alaihissalam ko tamam jahan par barguzida kiya . Rawi ne bayan kiya ke Musalman Yahudi ki baat sun kar khafa ho gaya aur is ke munh par ek tamancha raseed kiya . Woh Yahudi Rasool Allah salla Allahu alaihi wasallam ke paas gaya aur Nabi Karim salla Allahu alaihi wasallam se apna aur Musalman ka saara waqia bayan kiya . Nabi Karim salla Allahu alaihi wasallam ne farmaya ”dekho Musa alaihissalam par mujhko fazeelat mat do kyunke Qayamat ke din aisa ho ga ke soor phoonkte hi tamam log be-hosh ho jayein ge aur main sab se pehla shakhs hoon ga jise hosh aaye ga . Main kiya dekhoon ga ke Musa alaihissalam arsh e Ilaahi ka kona thaame huay hain . Mujhe nahi maloom ki Musa alaihissalam bhi in logon mein hon ge jo be-hosh huay thay aur phir mujh se pehle hi hosh mein aa gaye thay ya in mein se hon ge jinhein Allah Ta'ala ne is se mustas-na kar diya .“