Hum se Abdullah bin Maslamah Qanabi ne bayan kiya , kaha hum se Imam Malik ne , in se Amr bin Ubaidullah ke ghulam Abu al-Nadr ne , in se Umm Hani bint Abi Talib ke ghulam Abu Murrah ne khabar di ke unhon ne Umm Hani bint Abi Talib se suna . Unhon ne bayan kiya ke Fatah Makkah ke mauqa par main Rasool Allah salla Allahu alaihi wasallam ki khidmat mein hazir hui . Main ne dekha ke Aap ghusl kar rahe hain aur Aap ki sahibzadi Fatima razi Allahu anha ne parda kar diya hai . Main ne salam kiya to Nabi Karim salla Allahu alaihi wasallam ne daryaft kiya ke yeh kaun hain ? Main ne kaha ke Umm Hani bint Abi Talib hoon . Nabi Karim salla Allahu alaihi wasallam ne farmaya , Umm Hani! Marhaba ho . Jab Aap ghusl kar chuke to khare ho kar aath rakaat parhien . Aap is waqt ek kapre mein jism mubarak ko lapeite huay thay . Jab namaz se farigh ho gaye to main ne arz kiya: ya Rasool Allah! Mere bhai (Ali bin Abi Talib razi Allahu anhu) ka khayal hai ke woh ek aise shakhs ko qatl karein ge jise main ne aman de rakkhi hai . Yani falan bin Hubaira ko . Nabi Karim salla Allahu alaihi wasallam ne farmaya ke Umm Hani jise tum ne aman di usay hum ne bhi aman di . Umm Hani ne bayan kiya ke yeh namaz chasht ki thi .