Mujh se Muhammad bin Waleed ne bayan kiya, unhon ne kaha hum se Muhammad bin Jafar ne bayan kiya, unhon ne kaha hum se Shubah ne bayan kiya, unhon ne kaha ke mujh se Ubaidullah bin Abi Bakr ne bayan kiya, unhon ne kaha ke main ne Anas bin Malik razi Allahu anhu se suna, unhon ne bayan kiya ke Rasool Allah salla Allahu alaihi wasallam ne kabair ka zikr kiya ya (unhon ne kaha ke) Nabi Karim salla Allahu alaihi wasallam se kabair ke mutalliq poochha gaya to Nabi Karim salla Allahu alaihi wasallam ne farmaya ke Allah ke saath shirk karna, kisi ki (nahaq) jaan lena, walidain ki nafarmani karna phir farmaya kya main tumhein sab se bara gunah na bata doon? Farmaya ke jhooti baat ya farmaya ke jhooti shahadat (sab se bara gunah hai) Shubah ne bayan kiya ke mera ghalib guman yeh hai ke Nabi Karim salla Allahu alaihi wasallam ne jhooti gawahi farmaya tha.