Hum se Musaddad bin Musarhad ne bayan kiya, kaha hum se Husain bin Numair ne bayan kiya, in se Husain bin Abdur Rahman ne, in se Saeed bin Jubayr ne aur in se Ibn Abbas razi Allahu anhuma ne bayan kiya ke Rasool Allah salla Allahu alaihi wasallam ek din hamare paas bahar tashreef laaye aur farmaya ke (khwab mein) mujh par tamam ummatein pesh ki gayiein. Baaz Nabi guzarte aur in ke saath (in ki ittaba karne wala) sirf ek hota. Baaz guzarte aur in ke saath do hote baaz ke saath poori jama'at hoti aur baaz ke saath koi bhi na hota phir main ne ek bari jama'at dekhi jis se aasman ka kinara dhak gaya tha main samjha ke yeh meri hi ummat ho gi lekin mujh se kaha gaya ke yeh Musa alaihissalam aur in ki ummat ke log hain phir mujh se kaha ke dekho main ne ek bahut bari jama'at dekhi jis ne aasmanon ka kinara dhaanp liya hai. Phir mujh se kaha gaya ke idhar dekho, idhar dekho, main ne dekha ke bahut si jama'atein hain jo tamam ufuq par muheet thien. Kaha gaya ke yeh Aap ki ummat hai aur is mein se sattar hazar woh log hon ge jo be-hisab jannat mein dakhil kiye jayein ge phir sahabah mukhtalif jagahon mein uth kar chale gaye aur Nabi Karim salla Allahu alaihi wasallam ne is ki wazahat nahi ki ke yeh sattar hazar kaun log hon ge. Sahabah ikraam razi Allahu anhum ne aapas mein is ke mutalliq muzakira kiya aur kaha ke hamari paidaish to shirk mein hui thi albatta baad mein hum Allah aur is ke Rasool par iman le aaye lekin yeh sattar hazar hamare bete hon ge jo paidaish hi se Musalman hain. Jab Rasool Allah salla Allahu alaihi wasallam ko yeh baat pahunchi to Aap salla Allahu alaihi wasallam ne farmaya ke yeh sattar hazar woh log hon ge jo bad-fali nahi karte, na mantar se jhaarr-phoonk karaate hain aur na daagh lagate hain balkay apne Rabb par bharosa karte hain. Yeh sun kar Ukashah bin Muhsan razi Allahu anhu ne arz kiya: ya Rasool Allah! Kya main bhi in mein se hoon? Farmaya ke haan. Ek doosre sahab Saad bin Ubadah razi Allahu anhu ne khare ho kar arz kiya main bhi in mein se hoon? Nabi Karim salla Allahu alaihi wasallam ne farmaya ke Ukashah tum se baazi le gaye ke tum se pehle Ukashah ke liye jo hona tha ho chuka.