Hum se Yahya bin Sulayman ne bayan kiya, kaha ke mujh se Ibn Wahb ne bayan kiya, unhein Amr ne khabar di, un se Abu al-Nadr ne bayan kiya, in se Abu Qatadah ke ghulam Nafi aur Tuwama ke ghulam Abu Salih ne ke unhon ne Abu Qatadah razi Allahu anhu se suna, unhon ne bayan kiya ke main Makkah aur Madinah ke darmiyan raste mein Nabi Karim salla Allahu alaihi wasallam ke saath tha. Doosre log to ihram baandhe huay thay lekin main ihram mein nahi tha aur ek ghore par sawar tha. Main paharon par charhne ka bara aadi tha phir achanaak main ne dekha ke log lalchayi hui nazron se koi cheez dekh rahe hain. Main ne jo dekha to ek gor-khar tha. Main ne in se poochha ke yeh kya hai? Logon ne kaha hamain maloom nahi! Main ne kaha ke yeh to gor-khar hai. Logon ne kaha ke jo tum ne dekha hai wahi hai. Main apna kora bhool gaya tha is liye in se kaha ke mujhe mera kora de do lekin unhon ne kaha ke hum is mein tumhari koi madad nahi karein ge (kyunke hum mahram hain) main ne utar kar khud kora uthaya aur is ke peeche se usay maara, woh wahien gir gaya phir main ne usay zibah kiya aur apne sathiyon ke paas usay le kar aaya. Main ne kaha ke ab utho aur usay uthao, unhon ne kaha ke hum usay nahi chhoo-ein ge. Chunanche main hi usay utha kar un ke paas laya. Baaz ne to is ka gosht khaya lekin baaz ne inkar kar diya phir main ne in se kaha ke achha main ab tumhare liye Nabi Karim salla Allahu alaihi wasallam se rukne ki darkhwast karoon ga. Main Nabi Karim salla Allahu alaihi wasallam ke paas pahuncha aur Aap se waqia bayan kiya, Aap salla Allahu alaihi wasallam ne farmaya ke tumhare paas is mein se kuch baqi bacha hai? Main ne arz kiya ji haan. Farmaya khao kyunke yeh ek khana hai jo Allah Ta'ala ne tum ko khilaya hai.