Hum se Ali bin Abdullah Madini ne byaan kiya , kaha hum se Sufyan bin Uyaynah ne byaan kiya ke Amr ne kaha ke main ne Saeed bin Jubayr se suna , unhon ne byaan kiya ke main ne Ibn Umar razi Allahu anhuma se liaan karne walon ka hukm poocha to unhon ne byaan kiya ke in ke mutalliq Rasool Allah salla Allahu alaihi wasallam ne farmaya tha ke tumhara hisab to Allah Ta'ala ke zimma hai . Tum mein se ek jhoota hai . Ab tumhein tumhari biwi par koi ikhtiyar nahi . In sahabi ne arz kiya ke mera maal wapas kara dijiye (jo mahr mein diya gaya tha) . Nabi Karim salla Allahu alaihi wasallam ne farmaya ke ab woh tumhara maal nahi hai . Agar tum is ke muamla mein sache ho to tumhara yeh maal is ke badla mein khatam ho chuka ke tum ne is ki sharmgah ko halal kiya tha aur agar tum ne is par jhooti tohmat lagayi ku phir to woh tum se baeed-tar hai . Sufyan ne byaan kiya ke yeh hadees main ne Amr se yaad ki aur Ayub ne byaan kiya ke main ne Saeed bin Jubayr se suna , kaha ke main ne Ibn Umar razi Allahu anhuma se aise shakhs ke mutalliq poocha jis ne apni biwi se liaan kiya ho to Aap ne apni do ungliyon se isharah kiya . Sufyan ne is isharay ko apni do shahadat aur beech ki ungliyon ko juda kar ke bataya ke Nabi Karim salla Allahu alaihi wasallam ne qabila Bani Ajlan ke miyan biwi ke darmiyan judayi karayi thi aur farmaya tha ke Allah jaanta hai ke tum mein se ek jhoota hai , to kiya woh ruju kar le ga ? Aap ne teen martaba yeh farmaya . Ali bin Abdullah Madini ne kaha ke Sufyan bin Uyaynah ne mujh se kaha , main ne yeh hadees jaise Amr bin Dinar aur Ayub se sun kar yaad rakkhi ku waise hi tujh se byaan kar di .