Aur Allah Ta'ala ne (Surah al-Ahzab mein) farmaya «ya ayyuhal-lazhina aamanu izha nakahtum-ul-mu'minaati summa tallaqtumoohunna min qabli an tamassoohunna fama lakum alayhinna min iddatin t-tadoonaha famat-ti-oohunna wa sarrihoohunna saraahan jameelan» ”Ae Iman walon! Jab tum momin auraton se nikah karo phir tum unhein talaq de do . Qabal is ke ke tum ne unhein hath lagaya ho to ab un par koi iddat zaroori nahi hai jise tum shumar karne lago to un ke saath achha sulook kar ke achhi tarah rukhwat kar do .“ Aur Ibn Abbas razi Allahu anhuma ne kaha ke Allah Ta'ala ne talaq ko nikah ke baad rakkha hai . (is ko Imam Ahmad aur Baihaqi aur Ibn Khuzaima ne nikala) aur is silsile mein Ali razi Allahu anhu , Saeed bin Musayyab , Urwah bin Zubayr , Abu Bakr bin Abdur Rahman , Ubaidullah bin Abdullah bin Utbah , Aban bin Usman , Ali bin Husain , Shuraih , Saeed bin Jubayr , Qasim , Salim , Taoos , Hasan , Ikrimah , Ata , Aamir bin Saad , Jabir bin Zayd , Nafi bin Jubayr , Muhammad bin Kabb , Sulayman bin Kabb , Sulayman bin Yasar , Mujahid , Qasim bin Abdur Rahman , Amr bin Hazm aur Shabi rahmahullah alaihim in sab buzurgon se aaisi hi riwayatein aayi hain . Sab ne yahi kaha hai ke talaq nahi pare gi .

Nabi Karim salla Allahu alaihi wasallam ne farmaya ke Ibrahim alaihissalam ne apni biwi Sarah ko kaha ke yeh meri behen hai (yani Allah ki raah mein deeni behen) .

Isi tarah nasha ya junoon mein donon ka hukm ek hona , isi tarah bhool chook se talaq dena ya bhool chook se koi shirk (baazon ne yahan lafz waashka naqal kiya hai jo zyada qareen e qiyas hai) ka hukm nikaal baithna ya shirk ka koi kaam karna kyunke Nabi Karim salla Allahu alaihi wasallam ne farmaya ke tamam kaam niyat sahih par hote hain aur har ek aadmi ko wahi mile ga jo niyat kare aur Aamir Shabi ne yeh aayat parhi «la tu'aakhizhna in naseena au akhta'na» aur is baab mein yeh bhi byaan hai ke waswasi aur majnoon aadmi ka iqrar sahih nahi hai kyunke Nabi Karim salla Allahu alaihi wasallam ne is shakhs se farmaya jo zina ka iqrar kar raha tha . Kahin tujhko junoon to nahi hai aur Ali razi Allahu anhu ne kaha Janab e Ameer Hamzah ne meri oontniyon ke pait phaar daale (un ke gosht ke kabab banaye) Nabi Karim salla Allahu alaihi wasallam ne un ko malamat karni shuru ki phir Aap ne dekha ke woh nasha mein choor hain . Un ki aankhein surkh hain . Unhon ne (nashe ki halat mein) yeh jawab diya tum sab kiya meere baap ke ghulam nahi ho ? Nabi Karim salla Allahu alaihi wasallam ne pehchan liya ke woh bilkul nashe mein choor hain , Aap nikal kar chale aaye , hum bhi Aap ke saath nikal kharay huay . Aur Usman razi Allahu anhu ne kaha majnoon aur nashe wale ki talaq nahi pare gi (usay Ibn Abi Shaybah ne wasl kiya) . Aur Ibn Abbas razi Allahu anhuma ne kaha nashe aur zabardasti ki talaq nahi pare gi (is ko Saeed bin Mansoor aur Ibn Abi Shaybah ne wasl kiya) . Aur Uqbah bin Aamir Juhani sahabi razi Allahu anhu ne kaha agar talaq ka waswasa dilli mein aaye to jab tak zaban se na nikale talaq nahi pare gi . Aur Ata bin Abi Rabah ne kaha agar kisi ne pehle ( «anti taaliqun») kaha is ke baad shart lagayi ke agar tu ghar mein gayi to shart ke mutabiq talaq par jaye gi . Aur Nafi ne Ibn Umar razi Allahu anhuma se poocha agar kisi ne apni aurat se yun kaha tujhko talaq e baain hai agar tu ghar se nikli phir woh nikal khari hui to kiya hukm hai . Unhon ne kaha aurat par talaq e baain par jaye gi . Agar na nikle to talaq nahi pare gi aur Ibn Shihab Zuhri ne kaha (usay Abdur Razzaq ne nikala) . Agar koi mard yun kahe main aisa aisa na karoon to meri aurat par teen talaq hain . Is ke baad yun kahe jab main ne kaha tha to ek muddat muayyan ki niyat ki ku (yani ek saal ya do saal mein ya ek din ya do din mein) ab agar is ne aaisi hi niyat ki ku to muamla is ke aur Allah ke darmiyan rahe ga (woh jaane is ka kaam jaane) . Aur Ibrahim Nakhai ne kaha (usay Ibn Abi Shaybah ne nikala) agar koi apni joru se yun kahe ab mujhko teri zaroorat nahi hai to is ki niyat par madaar rahe ga . Aur Ibrahim Nakhai ne yeh bhi kaha ke doosri zaban walon ki talaq apni apni zaban mein ho gi . Aur Qatadah ne kaha agar koi apni aurat se yun kahe jab tujhko pait reh jaye to tujh par teen talaq hain is ko lazim hai ke har tuhr par aurat se ek baar sohbat kare aur jab maloom ho jaye ke is ko pait reh gaya , isi waqt woh mard se juda ho jaye gi . Aur Imam Hasan Basri ne kaha agar koi apni aurat se kaha ja apne maike chali ja aur talaq ki niyat ki to talaq par jaye gi . Aur Ibn Abbas razi Allahu anhuma ne kaha talaq to (majboori se) di jati hai zaroorat ke waqt aur ghulam ko aazad karna Allah ki raza-mandi ke liye hota hai . Aur Ibn Shihab Zuhri ne kaha agar kisi ne apni aurat se kaha tu meri joru nahi hai . Aur is ki niyat talaq ki thi to talaq par jaye gi aur Ali razi Allahu anhu ne farmaya (jise Baghwi ne Jadiyat mein wasl kiya) Umar! kiya tum ko yeh maloom nahi hai ke teen aadmi marfoo-ul-qalam hain (yani un ke aamal nahi likhe jaate) ek to pagal jab tak woh tandurust na ho , doosre bacha jab tak woh jawan na ho , teesre sone wala jab talak woh bedar na ho . Aur Ali razi Allahu anhu ne yeh bhi farmaya ke har ek ki talaq par jaye gi magar nadan , be-waqoof (jaise deewana , na-baligh , nasha mein mast waghaira) ki talaq nahi pare gi .

Hum se Muslim bin Ibrahim ne byaan kiya , kaha hum se Hisham bin Urwah ne byaan kiya , kaha hum se Qatadah ne byaan kiya , in se Zurarah bin Aufa ne aur in se Abu Hurairah razi Allahu anhu ne ke Nabi Karim salla Allahu alaihi wasallam ne farmaya ke Allah Ta'ala ne meri ummat ko khayalaat e fasida ki had tak maaf kiya hai , jab tak ke is par amal na kare ya usay zaban se ada na kare . Qatadah rahmahullah ne kaha ke agar kisi ne apne dilli mein talaq de di to is ka itibar nahi ho ga jab tak zaban se na kahe .