Hum se Mahmood bin Ghailan ne byaan kiya, kaha hum se Abu Usamah ne byaan kiya, kaha hum se Hisham bin Urwah ne byaan kiya, kaha ke mujhe mere walid ne khabar di aur un se Asmaa bint Abi Bakr razi Allahu anhuma ne byaan kiya ke Zubayr razi Allahu anhu ne mujh se shadi ki to un ke paas ek oont aur un ke ghore ke siwa roo-e-zameen par koi maal, koi ghulam, koi cheez nahi thi. Main hi un ka ghora churrati, pani pilati, un ka dowl seeti aur aata goondhti. Main achhi tarah roti nahi paka sakti thi. Ansar ki kuch larkiyaan meri roti paka jaati thien. Yeh bari sachi aur ba-wafa auratein thien. Zubayr razi Allahu anhu ki woh zameen jo Rasool Allah salla Allahu alaihi wasallam ne unhein di thi, is se main apne sar par khajoor ki ghulliyaan ghar laya karti thi. Yeh zameen mere ghar se do meel door thi. Ek roz main aa rahi thi aur ghulliyaan mere sar par thien ke raste mein Rasool Allah salla Allahu alaihi wasallam se mulaqat ho gayi. Nabi Karim salla Allahu alaihi wasallam ke saath qabila Ansar ke kai aadmi thay. Nabi Karim salla Allahu alaihi wasallam ne mujhe bulaya phir (apne oont ko bithane ke liye) kaha ikh ikh. Nabi Karim salla Allahu alaihi wasallam chahte thay ke mujhe apni sawari par apne peeche sawar kar lein lekin mujhe mardon ke saath chalne mein sharam aayi aur Zubayr razi Allahu anhu ki ghairat ka bhi khayal aaya. Zubayr razi Allahu anhu bare hi ba-ghairat thay. Nabi Karim salla Allahu alaihi wasallam bhi samajh gaye ke main sharam mehsoos kar rahi hoon. Is liye Aap aage barh gaye. Phir main Zubayr razi Allahu anhu ke paas aayi aur un se waqia ka zikr kiya ke Nabi Karim salla Allahu alaihi wasallam se meri mulaqat ho gayi thi. Mere sar par ghulliyaan thien aur Nabi Karim salla Allahu alaihi wasallam ke saath Aap ke chand sahabah bhi thay. Nabi Karim salla Allahu alaihi wasallam ne apna oont mujhe bithane ke liye bithaya lekin mujhe is se sharam aayi aur tumhari ghairat ka bhi khayal aaya. Is par Zubayr ne kaha ke Allah ki qasam! Mujhko to is se bara ranj hua ke tu ghulliyaan laane ke liye nikle agar tu Nabi Karim salla Allahu alaihi wasallam ke saath sawar ho jaati to itni ghairat ki baat na thi (kyunke Asmaa razi Allahu anha Aap ki saali aur bhawaj donon hoti thien) is ke baad mere walid Abu Bakr razi Allahu anhu ne ek ghulam mere paas bhej diya woh ghore ka sab kaam karne laga aur main be-fikr ho gayi goya walid e majid Abu Bakr razi Allahu anhu ne (ghulam bhej kar) mujhko aazad kar diya.