Musa bin Ismail ne hum se Hadees bayan ki, un ko Abu ’Awaanah ne khabar di, un se Musa Ibn-e-Abi Aisha ne bayan ki, un se Sa’eed bin Jubair ne unhon ne Ibn-e-Abbas Radhiallahu Anhuma se kalaam-e-ilaahi «لَا تُحَرِّكْ بِهِ لِسَانَكَ لِتَعْجَلَ بِهِ» aakhir tak ki tafseer ke silsile mein suna ke Rasoolullah Sallallahu Alaihi Wasallam nuzool-e-Quran ke waqt bahut sakhti mehsoos farmaaya karte the aur us ki (alaamaton) mein se ek yeh thi ke yaad karne ke liye Aap apne honton ko hilaate the. Ibn-e-Abbas Radhiallahu Anhuma ne kaha main apne hont hilaata hun jis tarah Aap hilaate the. Sa’eed kehte hain main bhi apne hont hilaata hun jis tarah Ibn-e-Abbas Radhiallahu Anhuma ko main ne hilaate dekha. Phir unhon ne apne hont hilaaye. (Ibn-e-Abbas Radhiallahu Anhuma ne kaha) phir yeh Aayat utri ke aye Muhammed! Quran ko jald jald yaad karne ke liye apni zabaan na hilaao. Us ka jama kar dena aur padha dena hamaara zimma hai. Ibn-e-Abbas Radhiallahu Anhuma kehte hain yani Quran Aap Sallallahu Alaihi Wasallam ke dil main jama dena aur padha dena hamaare zimme hai. Phir jab hum padh chuken to us padhe huwe ki ittebaa’ karo. Ibn-e-Abbas Radhiallahu Anhuma farmaate hain (is ka matlab yeh hai) ke Aap us ko khamoshi ke saath sunte raho. Us ke baad matlab samjha dena hamaare zimme hai. Phir yaqeenan yeh hamaari zimmedaari hai ke Aap us ko padho (yani us ko mehfooz kar sako) chunanche us ke baad jab Aap ke paas Jibrael Alaihissalam (Wahi le kar) aate to Aap (tawajjo se) sunte. Jab woh chale jaate to Rasoolullah Sallallahu Alaihi Wasallam us (Wahi) ko usi tarah padhte jis tarah Jibrael Alaihissalam ne use padha tha.