Ibn-e-Shihaab kehte hain mujh ko Abu Salamah bin Abdur Rahman ne Jabir bin Abdullah Ansari Radhiallahu Anhuma se yeh riwayat naql ki ke Aap Sallallahu Alaihi Wasallam ne Wahi ke ruk jaane ke zamaane ke halaat bayan farmaate huwe kaha ke ek roz main chala jaa raha tha ke achaanak main ne aasman ki taraf ek aawaaz suni aur main ne apna sar aasman ki taraf uthaaya kya dekhta hun ke wahi farishta jo mere paas Ghaar-e-Hira mein aaya tha woh aasman-o-zameen ke beech mein ek kursi par baitha huwa hai. Main us se darr gaya aur ghar aane par main ne phir kambal odhne ki khwahish zahir ki. Us waqt Allah paak ki taraf se yeh aayaat naazil huen. Aye lihaaf odh kar letne waale! Uth khada ho aur logon ko azaab-e-ilaahi se dara aur apne Rabb ki badaayi bayan kar aur apne kapdon ko paak saaf rakh aur gandagi se door reh. Us ke baad Wahi tezi ke saath pe-dar-pe aane lagi. Is Hadees ko Yahya bin Bukair ke alawah Laith bin Sa’d se Abdullah bin Yousuf aur Abu Saleh ne bhi riwayat kiya hai. Aur Uqail ke alawah Zohri se Hilal bin Raddad ne bhi riwayat kiya hai. Younus aur Ma’mar ne apni riwayat mein lafz «فُؤَادُهُ» ki jagah «بَوَادِرُهُ» naql kiya hai.