Mujahid ne kaha «kanoodun» ka maani na-shukra hai. «fa-asarna bihi naq-an» yani subah ke waqt dhool ureate hain, gard uthate hain. «li-hubbil khayri» yani maal ki qillat ki wajah se. «la-shadeedun» bakheel hai bakheel ko «la-shadeedun» kehte hain. «hussila» ke maani juda kiya jaye ya jama kiya jaye.

«kal-farashil mabsoosi» yani pareshan tiddiyon ki tarah ki jaise woh aaisi halat mein ek doosre par charh jati hain yahi haal (hashr ke din) insanon ka ho ga ke woh ek doosre par gir rahe hon ge «kal-ihn-i» oon ki tarah rang birang. Abdullah bin Masood razi Allahu anhu ne yun parha hai «as-soofil manfoo-shi» yani dhani hui oon ki tarah urte phirein ge.

Ibn Abbas razi Allahu anhuma ne kaha ke «at-takaasuru» se maal o aulad ka bahut hona murad hai.

Yahya bin Ziyad Farra ne kaha ke «al-asru» se murad zamana hai isi ki qasam khayi gayi hai.

«al-hutamatu» dozakh ka ek naam hai jaise «saqaru» aur «lazha» bhi is ke naamon mein se hain.

Mujahid ne kaha «ababeela» yani pay dar pay aane wale jhund ke jhund parinde . Ibn Abbas razi Allahu anhuma ne kaha «min sijjeelin» (yeh lafz Farsi ka muarrab hai) yani sang patthar aur gull mitti murad hai .

Mujahid ne kaha «li-eelafi Quraishin» ka matlab yeh hai ke Quraish ke logon ka dil safar mein laga diya tha , garmi jare kisi bhi mausam mein un par safar karna dushwar na tha aur un ko Haram mein jagah de kar dushmanon se be-fikr kar diya tha . Sufyan bin Uyaynah ne kaha ke «li-eelafi Quraishin» ka maani yeh hai Quraish par mere ihsan ki wajah se .“

Mujahid ne kaha «yadu'u» ka maani dafa karta hai yani yateem ko us ka haq nahi lene deta , kehte hain yeh «da'watun» se nikla hai . Isi se Surah at-Toor mein lafz «yawma yuda'oona» hai (yani jis din dozakh ki taraf uthaye jayein ge , dhakele jayein ge . «saahoona» bhoolne wale , ghafil . «maa'oonan» kehte hain mruwat ke har achhe kaam ko . Baaz Arab «maa'oonan» pani ko kehte hain . Ikrimah ne kaha «maa'oonan» ka aala darja zakat dena hai aur adna darja yeh hai ke koi shakhs kuch saman maange to usay woh dede , is ka inkar na kare .

Ibn Abbas razi Allahu anhuma ne kaha «shaani'aka» tera dushman .

Hum se Adam bin Abi Iyas ne byaan kiya , kaha hum se Shayban bin Abdur Rahman ne byaan kiya , un se Qatadah ne byaan kiya , un se Anas bin Malik razi Allahu anhu ne byaan kiya ke jab Nabi salla Allahu alaihi wasallam ko Meraj hui Nabi salla Allahu alaihi wasallam ne farmaya ke main ek nahar par pahuncha jis ke donon kinaron par kholdar motiyon ke deray lage huay thay . Main ne poocha Ae Jibraeel! Yeh nahar kaisi hai ? Unhon ne bataya ke yeh Hauz e Kausar hai (jo Allah ne Aap ko diya hai) .