Imam Hasan Basri ne kaha «sujjirat» ka maani yeh hai ke samundar sookh jayein ge , un mein pani ka ek qatra bhi baqi na rahe ga . Mujahid ne kaha «masjoor» ka maani (jo Surah at-Toor mein hai) bhara ho auron ne kaha «sujjirat» ka maani yeh hai ke samundar phoot kar ek doosre se mil kar ek samundar ban jayein ge . «khunnas» chalne ke maqam mein , phir laut kar aane wale . «kun-nas» , «taknisu» se nikla hai yani haran ki tarah chhup chhup jate hain . «tanaffasa» din charh jaye . «zhaneenun» (zhaa mu-ajma se yeh bhi ek qirat hai) yani tohmat lagata hai aur «dhaneenun» is ka maani yeh hai ke woh Allah ka paigham pahunchane mein bakheel nahi hai aur Umar razi Allahu anhu ne kaha «an-nufoosu zuwwijat» yani har aadmi ka jorr laga diya jaye ga khwah jannati ho ya dozakhi phir yeh aayat parhi «uhshurul-lazhina zhalamoo wa azwaajahum» , «as-asa» jab raat peeth pher le ya jab raat ka andhera aa pare .

Rabia bin Khusaym ne kaha «fujjirat» ke maani beh niklein aur Aamash aur Aasim ne «fa-adalaka» ko takhfeef ke saath parha hai . Hijaz walon ne «fa-ad-dalaka» tashdeed daal ke saath parha hai . Jab tashdeed ke saath ho to maani yeh ho ga ke bari khalqat munasib aur muatadil rakkhi aur takhfeef ke saath parho to maani yeh ho ga jis surat mein chaha tujhe bana diya khubsoort ya bad-surat lamba ya thagna chhotay qad wala .

Aur Mujahid ne kaha ke «bal raana» ka maani yeh hai ke gunah un ke dil par jamm gaya . «suwwiba» badla diye gaye . Auron ne kaha «mutaffif» woh hai jo poora maap toul na de (dagha-baazi kare) .

Hum se Ibrahim bin al-Munzhir ne byaan kiya , unhon ne kaha hum se Maan ne byaan kiya , unhon ne kaha ke mujh se Malik ne byaan kiya , un se Nafi aur un se Abdullah bin Umar razi Allahu anhuma ne byaan kiya ke Nabi Karim salla Allahu alaihi wasallam ne farmaya ke jis din log donon jahan ke paalne wale ke samne hisab dene ke liye kharay hon ge to kaanon ki lau tak paseene mein doob jayein ge .