Ibn Abbas razi Allahu anhuma ne kaha «turji-u» ka maani peeche daal de . Isi se Surah al-A'raf ka yeh lafz hai «arjih-hu» yani is ko dheel mein rakho .

Hum se Zakariya bin Yahya ne byaan kiya , kaha hum se Abu Usamah ne byaan kiya , kaha hum se Hisham ne apne walid se sun kar byaan kiya aur un se Aisha razi Allahu anha ne byaan kiya ke jo auratein apne nafs ko Rasool Allah salla Allahu alaihi wasallam ke liye hiba karne aati thien mujhe un par bari ghairat aati thi . Main kehti ke kya aurat khud hi apne ko kisi mard ke liye pesh kar sakti hai ? Phir jab Allah Ta'ala ne yeh aayat nazil ki «turji-u man tashaa-u minhunna wa tu'wee ilayka man tashaa-u wa man-ibtaghayta mimman azalta fala junaha alayka» ke ”in mein se jis ko chahein apne se door rakhein aur jis ko chahein apne nazdeek rakhein aur jin ko Aap ne alag kar rakkha tha is mein se kisi ko phir talab kar lein jab bhi , Aap par koi gunah nahi hai .“ To main ne kaha ke main to samajhti hoon ke Aap ka Rabb Aap ki murad bila takheer poori kar dena chahta hai .