Mujh se Abdullah bin Muhammad Jafi ne byaan kiya , kaha ke mujh se Yahya Ibn Mueen ne byaan kiya , kaha hum se Hajjaj bin Muhammad ne byaan kiya , un se Ibn Jurayj ne byaan kiya , un se Ibn Abi Mulaykah ne byaan kiya ke Ibn Abbas aur Ibn Zubayr razi Allahu anhum ke darmiyan bai'at ka jhagra paida ho gaya tha . Main subah ko Ibn Abbas razi Allahu anhuma ki khidmat mein hazir hua aur arz kiya Aap Abdullah bin Zubayr razi Allahu anhuma se jang karna chahte hain , is ke bawajood ke Allah ke Haram ki be-hurmati ho gi ? Ibn Abbas razi Allahu anhuma ne farmaya: Ma'azhallah! Yeh to Allah Ta'ala ne Ibn Zubayr aur Banu Umayyah hi ke muqaddar mein likh diya hai ke woh Haram ki be-hurmati karein . Allah ki qasam! Main kisi surat mein bhi is be-hurmati ke liye tayyar nahi hoon . Ibn Abbas razi Allahu anhuma ne byaan kiya ke logon ne mujh se kaha tha ke Ibn Zubayr se bai'at kar lo . Main ne un se kaha ke mujhe un ki khilafat ko tasleem karne mein kya ta-ammul ho sakta hai , un ke walid Nabi Karim salla Allahu alaihi wasallam ke hawari thay , Aap ki murad Zubayr bin Awwam se thi . Un ke nana sahib e ghaar thay , isharah Abu Bakr Siddique razi Allahu anhu ki taraf tha . Un ki walda sahib e nitaqayn thien yani Asma razi Allahu anha . Un ki khala Umm al-Momineen thien , murad Aisha razi Allahu anha se thi . Un ki phoopi Nabi Karim salla Allahu alaihi wasallam ki zauja mutahhara thien , murad Khadija razi Allahu anha se thi . Ibn Abbas ki murad in baaton se yeh thi ke woh bahut si khubiyon ke malik hain aur Nabi Karim salla Allahu alaihi wasallam ki phoopi un ki dadi hain , isharah Safiya razi Allahu anha ki taraf tha . Is ke alawa woh khud Islam mein hamesha saaf kirdar aur paak daman rahe aur Quran ke aalim hain aur Allah ki qasam! Agar woh mujh se achha bartao karein to un ko karna hi chahiye woh mere bahut qareeb ke rishta-dar hain aur agar woh mujh par hukoomat karein to khair hukoomat karein woh hamare barabar ke izzat wale hain . Lekin Abdullah bin Zubayr razi Allahu anhuma ne to Tuwayt , Usamah aur Humayd ke logon ko hum par tarjeeh di hai . Un ki murad mukhtalif qabail yani Banu Asad , Banu Tuwayt , Banu Usamah aur Banu Asad se thi . Idhar Ibn Abi al-Aas bari umdagi se chal raha hai yani Abdul Malik bin Marwan musalsal pesh-qadmi kar raha hai aur Abdullah bin Zubayr razi Allahu anhuma ne is ke samne dum daba li hai .