Mamar ne kaha ke «mawali» se murad is ke auliya aur waris hain . «wallazhina aqadat aimanukum» se woh log murad hain jin ko qasam kha kar apna waris banate thay yani haleef . Aur «maula» ke kai maani aaye hain , chacha ka beta , ghulam , laundi ka malik , jo is par ihsan kare , usay aazad kare , khud ghulam , jo aazad kiya jaye , malik , deen ka peshwa .

Hum se Salt bin Muhammad ne byaan kiya , unhon ne kaha hum se Abu Usamah ne byaan kiya , un se Idrees ne , un se Talha bin Musarrif ne , un se Saeed bin Jubayr ne byaan kiya aur un se Abdullah bin Abbas razi Allahu anhuma ne byaan kiya ke (aayat mein) «wa likullin jaalna mawaliya» se murad waris hain aur «wallazhina aaqadat aimanukum» ki tafseer yeh hai ke shuru mein jab Muhajireen Madinah aaye to qarabati daron ke alawa Ansar ke waris Muhajireen bhi hote thay . Is bhai chara ki wajah se jo Nabi Karim salla Allahu alaihi wasallam ne Muhajireen aur Ansar ke darmiyan karaya tha , phir jab yeh aayat nazil hui ke «wa likullin jaalna mawaliya» to pehla tariqa mansookh ho gaya phir byaan kiya ke «wallazhina aaqadat aimanukum» se woh log murad hain , jin se dosti aur madad aur khair-khwahi ki qasam kha kar ahad kiya jaye . Lekin ab un ke liye miras ka hukm mansookh ho gaya magar wasiyat ka hukm reh gaya . Is isnaad mein Abu Usamah ne Idrees se aur Idrees ne Talha bin Musarrif se suna hai .