Mujh se Ibrahim bin al-Munzhir ne byaan kiya , kaha hum se Abu Zamrah ne byaan kiya , un se Musa bin Uqbah ne byaan kiya , un se Nafi ne aur un se Abdullah bin Umar razi Allahu anhuma ne ke kuch Yahudi Nabi Karim salla Allahu alaihi wasallam ke paas apne qabila ke ek mard aur ek aurat ko le kar aaye , jinon ne zina kiya tha . Aap salla Allahu alaihi wasallam ne un se poocha agar tum mein se koi zina kare to tum us ko kya saza dete ho ? Unhon ne kaha ke hum is ka munh kala kar ke usay maarte peette hain . Aap salla Allahu alaihi wasallam ne farmaya kya Taurat mein rajm ka hukm nahi hai ? Unhon ne kaha ke hum ne Taurat mein rajm ka hukm nahi dekha . Abdullah bin Salam razi Allahu anhu bolay ke tum jhoot bol rahe ho , Taurat lao aur usay parho , agar tum sache ho . (Jab Taurat layi gayi) to un ke ek bahut bare mudarris ne jo unhein Taurat ka dars diya karta tha , aayat e rajm par apni hatheli rakh li aur is se pehle aur is ke baad ki ibarat parhne laga aur aayat e rajm nahi parhta tha . Abdullah bin Salam razi Allahu anhu ne is ke hath ko aayat e rajm se hata diya aur is se poocha ke yeh kya hai ? Jab Yahudiyon ne dekha to kehne lage ke yeh aayat e rajm hai . Phir Nabi Karim salla Allahu alaihi wasallam ne hukm diya aur in donon ko Masjid e Nabwi ke qareeb hi jahan janaze la kar rakkhe jate thay , rajm kar diya gaya . Main ne dekha ke is aurat ka saathi aurat ko patthar se bachane ke liye is par jhuk jhuk parta tha .