Hum se Usman bin Haysam ne byaan kiya , kaha hum se Auf Aarabi ne byaan kiya , un se Imam Hasan Basri ne , un se Abu Bakrah razi Allahu anhu ne byaan kiya ke Jang e Jamal ke mauqa par woh jumla mere kaam aa gaya jo main ne Rasool Allah salla Allahu alaihi wasallam se suna tha . Main irada kar chuka tha ke As-haab e Jamal , Aisha razi Allahu anha aur Aap ke lashkar ke saath shareek ho kar (Ali razi Allahu anhu ki) fauj se laroon . Unhon ne byaan kiya ke jab Nabi Karim salla Allahu alaihi wasallam ko maloom hua ke Ahl e Faris ne Kisra ki larki ko waris e takht o taaj banaya hai to Aap salla Allahu alaihi wasallam ne farmaya ke woh qaum kabhi falah nahi pa sakti jis ne apna hukmran kisi aurat ko banaya ho .