Hum se Saeed bin Muhammad Jarmi ne byaan kiya , kaha hum se Yaqoob bin Ibrahim ne byaan kiya , kaha mujh se un ke walid Ibrahim bin Saad ne , un se Salih bin Kaysan ne , un se Ibn Ubaydah bin Nasheet ne , doosre mauqa par (Ibn Ubaydah razi Allahu anhu) ke naam ki tasreeh hai yani Abdullah aur un se Ubaydullah bin Abdullah bin Utbah ne byaan kiya ke hamain maloom hai ke jab Musaylamah Kazzab Madinah aaya to Bint Harith ke ghar us ne qiyam kiya , kyunke Bint Harith bin Kurayz us ki biwi thi . Yahi Abdullah bin Abdullah bin Damir ki maan hai , phir Nabi Karim salla Allahu alaihi wasallam us ke yahan tashreef laye (tableegh ke liye) Aap ke saath Sabit bin Qays bin Shammas razi Allahu anhu bhi thay . Sabit razi Allahu anhu wahi hain jo Nabi Karim salla Allahu alaihi wasallam ke khateeb ke naam se mashhoor thay . Nabi Karim salla Allahu alaihi wasallam ke hath mein ek chhari thi . Aap salla Allahu alaihi wasallam us ke paas aa kar thehar gaye aur us se guftagu ki aur usay Islam ki dawat di . Musaylamah ne kaha ke main is shart par Musalman hota hoon ke Aap ke baad mujh ko hukoomat mile . Nabi Karim salla Allahu alaihi wasallam ne farmaya ke agar tum mujh se yeh chhari maango ge to main yeh bhi nahi de sakta aur main to samajhta hoon ke tum wahi ho jo mujhe khwab mein dikhaye gaye thay . Yeh Sabit bin Qays razi Allahu anhu hain aur meri taraf se tumhari baaton ka yahi jawab dein ge , phir Aap salla Allahu alaihi wasallam wapas tashreef le aaye .