Hum se Yahya Bin Bukair ne bayan kiya ‘ kaha hum se Laith Bin Saad ne bayan kiya ‘ in se Aqeel ne ‘ in se Ibn Shihab ne ‘ in se Urwah ne ‘ in se Aisha Radi Allahu Anha ne ke Nabi Kareem Sallallahu Alaihi Wasallam ki sahabzadi Fatima Radi Allahu Anha ne Abu Bakr Siddiq Radi Allahu Anhu ke pas kisi ko bheja aur in se apni meras ka mutaliba kiya Nabi Kareem Sallallahu Alaihi Wasallam ke is maal se jo Aap ko Allah Ta'ala ne Madina aur Fadak mein inayait farmaya tha aur Khaibar ka jo panchwan hissa reh gaya tha. Abu Bakr Radi Allahu Anhu ne ye jawab diya ke Nabi Kareem Sallallahu Alaihi Wasallam ne khud hi irshad farmaya tha ke hum paighambaron ka koi waris nahi hota ‘ hum jo kuch chor jayein wo sab sadqa hota hai ‘ albatta Aal-e-Muhammad Sallallahu Alaihi Wasallam isi maal se khati rahe gi aur mein, Allah ki qasam! Jo sadqa Nabi Kareem Sallallahu Alaihi Wasallam chor gaye hain is mein kisi qism ka taghayyur nahi karunga. Jis haal mein wo Aap Sallallahu Alaihi Wasallam ke ehed mein tha ab bhi usi tarah rahe ga aur is mein (is ki taqseem waghaira) mein mein bhi wahi tarz-e-amal ikhtiyar karunga jo Aap Sallallahu Alaihi Wasallam ka apni zindagi mein tha. Gharaz Abu Bakr Radi Allahu Anhu ne Fatima Radi Allahu Anha ko kuch bhi dena manzoor na kiya. Is par Fatima Radi Allahu Anha Abu Bakr Radi Allahu Anhu ki taraf se khafa ho gayin aur in se tark-e-mulaqat kar liya aur is ke baad wafat tak in se koi guftagu nahi ki. Fatima Radi Allahu Anha Aap Sallallahu Alaihi Wasallam ke baad che mahine tak zinda rahin. Jab in ki wafat hui to in ke shohar Ali Radi Allahu Anhu ne unhein raat mein dafan kar diya aur Abu Bakr Radi Allahu Anhu ko is ki khabar nahi di aur khud in ki namaz-e-janaza parh li. Fatima Radi Allahu Anha jab tak zinda rahin Ali Radi Allahu Anhu par log bahut tawajju rakhte rahe lekin in ki wafat ke baad unhon ne dekha ke ab logon ke munh in ki taraf se phere hue hain. Is waqt unhon ne Abu Bakr Radi Allahu Anhu se sulh kar lena aur in se baiat kar lena chaha. Is se pehle che mah tak unhon ne Abu Bakr Radi Allahu Anhu se baiat nahi ki thi phir unhon ne Abu Bakr Radi Allahu Anhu ko bula bheja aur kehla bheja ke Aap sirf tanha aayein aur kisi ko apne sath na layein un ko ye manzoor na tha ke Umar Radi Allahu Anhu in ke sath aayein. Umar Radi Allahu Anhu ne Abu Bakr Radi Allahu Anhu se kaha ke Allah ki qasam! Aap tanha in ke pas na jayein. Abu Bakr Radi Allahu Anhu ne kaha kyun wo mere sath kya karein ge mein to Allah ki qasam! Zaroor in ki pas jaoonga. Aakhir Aap Ali Radi Allahu Anhu ke yahan gaye. Ali Radi Allahu Anhu ne Allah ko gawah kiya ‘ is ke baad farmaya humein Aap ke fazl-o-kamal aur jo kuch Allah Ta'ala ne Aap ko bakhsha hai ‘ sab ka humein iqrar hai jo khair-o-imtiyaz Aap ko Allah Ta'ala ne diya tha hum ne is mein koi rees bhi nahi ki lekin Aap ne hamare sath ziyadati ki (ke khilafat ke muamle mein hum se koi mashwara nahi liya) hum Rasul Allah Sallallahu Alaihi Wasallam ke sath apni qarabat ki wajah se apna haq samajhte thay (ke Aap hum se mashwara karte) Abu Bakr Radi Allahu Anhu par in baaton se girya tari ho gayi aur jab baat karne ke qabil hue to farmaya is zaat ki qasam! Jis ke hath mein meri jaan hai Rasul Allah Sallallahu Alaihi Wasallam ki qarabat ke sath sila rahmi mujhe apni qarabat se sila rahmi se zyada aziz hai. Lekin mere aur logon ke darmiyan in amwal ke silsile mein jo ikhtilaf hua hai to mein is mein haq aur khair se nahi hata hoon aur is silsila mein jo rasta mein ne Nabi Kareem Sallallahu Alaihi Wasallam ka dekha khud mein ne bhi usi ko ikhtiyar kiya. Ali Radi Allahu Anhu ne is ke baad Abu Bakr Radi Allahu Anhu se kaha ke dopahar ke baad mein Aap se baiat karunga. Ali Radi Allahu Anhu ne is ke baad Abu Bakr Radi Allahu Anhu se kaha ke dopahar ke baad mein Aap se baiat karunga. Chunancha zohar ki namaz se farigh ho kar Abu Bakr Radi Allahu Anhu minbar par aaye aur khutba ke baad Ali Radi Allahu Anhu ke muamle ka aur in ke ab tak baiat na karne ka zikr kiya aur wo uzr bhi bayan kiya jo Ali Radi Allahu Anhu ne pesh kiya tha phir Ali Radi Allahu Anhu ne istighfar aur shahadat ke baad Abu Bakr Radi Allahu Anhu ka haq aur in ki buzurgi bayan ki aur farmaya ke jo kuch unhon ne kiya hai is ka bais Abu Bakr Radi Allahu Anhu se hasad nahi tha aur na in ke fazl-o-kamal ka inkar maqsood tha jo Allah Ta'ala ne unhein inayait farmaya ye baat zaroori thi ke hum is muamla khilafat mein apna haq samajhte thay (ke hum se mashwara liya jata) hamare sath yahi ziyadati hui thi jis se humein ranj pahuncha. Musalman is waqia par bahut khush hue aur kaha ke Aap ne durust farmaya. Jab Ali Radi Allahu Anhu ne is muamla mein ye munasib rasta ikhtiyar kar liya to musalman in se khush ho gaye aur Ali Radi Allahu Anhu se aur zyada muhabbat karne lage jab dekha ke unhon ne acchi baat ikhtiyar kar li hai
.