Hum se Abdullah Bin Muhammad ne bayan kiya ‘ unhon ne kaha hum se Muawiya Bin Amr ne bayan kiya ‘ unhon ne kaha hum se Abu Ishaq ne bayan kiya ‘ in se Imam Malik Bin Anas ne bayan kiya ‘ in se Saur ne bayan kiya ‘ unhon ne kaha ke mujh se Ibn Mutie ke Maula Salim ne bayan kiya aur unhon ne Abu Huraira Radi Allahu Anhu se suna ‘ unhon ne bayan kiya ke jab Khaibar fatah hua to maal-e-ghanimat mein sona aur chandi nahi mila tha balkey gaye ‘ oont ‘ saman aur baghat mile thay phir hum Rasul Allah Sallallahu Alaihi Wasallam ke sath Wadi-ul-Qura ki taraf laute. Nabi Kareem Sallallahu Alaihi Wasallam ke sath ek Mid'am nami ghulam tha jo Bani Zibab ke ek sahabi ne Aap ko hadiya mein diya tha. Wo Nabi Kareem Sallallahu Alaihi Wasallam ka kajawa utaar raha tha ke kisi namaloom simt se ek teer aa kar in ke laga. Logon ne kaha mubarak ho: Shahadat! Lekin Aap Sallallahu Alaihi Wasallam ne farmaya ke hargiz nahi ‘ is zaat ki qasam! Jis ke hath mein meri jaan hai jo chadar is ne Khaibar mein taqseem se pehle maal-e-ghanimat mein se churayi thi wo is par aag ka shola ban kar bhark rahi hai. Ye sun kar ek dusre sahabi ek ya do tasme le kar Nabi Kareem Sallallahu Alaihi Wasallam ki khidmat mein hazir hue aur arz kiya ke ye mein ne utha liye thay. Nabi Kareem Sallallahu Alaihi Wasallam ne farmaya ke ye bhi jahannum ka tasma banta
.