Hum se Abdullah Bin Maslama ne bayan kiya ‘ kaha hum se Hatim Bin Ismail ne bayan kiya ‘ in se Yazid Bin Abi Ubaid ne aur in se Salama Bin Akwa Radi Allahu Anhu ne bayan kiya ke hum Nabi Kareem Sallallahu Alaihi Wasallam ke sath Khaibar ki taraf nikle. Raat ke waqt hamara safar jari tha ke ek sahib (Usaid Bin Hudair) ne Amir se kaha: Amir! Apne kuch sher sunao ‘ Amir shayar thay. Is farmaish par wo sawari se utar kar hadi khwani karne lage. Kaha ”Ai Allah! Agar tu na hota to humein seedha rasta na milta ‘ na hum sadqa kar sakte aur na hum namaz parh sakte. Pas hamari jaldi maghfirat kar, jab tak hum zinda hain hamari jaanen tere raste mein fida hain aur agar hamari mudbher ho jaye to humein sabit rakh hum par sakeenat nazil farma, humein jab (batil ki taraf) bulaya jata hai to hum inkar kar deyte hain, aaj chala chala kar wo hamare khilaf maidan mein aaye hain.“ Nabi Kareem Sallallahu Alaihi Wasallam ne farmaya ke kaun sher keh raha hai? Logon ne bataya ke Amir Bin Akwa hain. Aap Sallallahu Alaihi Wasallam ne farmaya ke Allah is par apni rahmat nazil farmaye. Sahaba (Radi Allahu Anhum) ne arz kiya: Ya Rasul Allah! Aap ne to unhein shahadat ka mustahiq qarar de diya ‘ kash! Abhi aur humein in se faida uthane deyte. Phir hum Khaibar aaye aur qila ka muhasara kiya ‘ is dauran humein sakht takaleef aur faqon se guzarna para. Aakhir Allah Ta'ala ne humein fatah ata farmai. Jis den qila fatah hona tha ‘ is ki raat jab hui to lashkar mein jagah jagah aag jal rahi thi. Nabi Kareem Sallallahu Alaihi Wasallam ne poocha ye aag kaisi hai ‘ kis cheez ke liye ise jagah jagah jala rakha hai? Sahaba (Radi Allahu Anhum) bole ke gosht pakane ke liye ‘ Aap Sallallahu Alaihi Wasallam ne daryaft farmaya ke kis janwar ka gosht hai? Sahaba (Radi Allahu Anhum) ne bataya ke paltu gadhon ka ‘ Aap Sallallahu Alaihi Wasallam ne farmaya ke tamam gosht phaink do aur handiyon ko tor do. Ek sahabi Radi Allahu Anhu ne arz kiya: Ya Rasul Allah! Aisa na kar lein ke gosht to phaink dein aur handiyon ko dho lein? Aap Sallallahu Alaihi Wasallam ne farmaya ke yun hi kar lo phir (den mein jab sahaba Radi Allahu Anhum ne jung ke liye) saff bandi ki to chunchke Amir Radi Allahu Anhu ki talwar chhoti thi ‘ is liye unhon ne jab ek yahoodi ki pindli par (jhuk kar) waar karna chaha to khud unhi ki talwar ki dhaar se in ke ghutne ka upar ka hissa zakhmi ho gaya aur in ki shahadat isi mein ho gayi. Bayan kiya ke phir jab lashkar wapas ho raha tha to Salama Bin Akwa Radi Allahu Anhu ka bayan hai ke mujhe Aap Sallallahu Alaihi Wasallam ne dekha aur mera hath pakar kar farmaya ‘ kya baat hai? Mein ne arz kiya ‘ mere maa baap Aap par qurban hon ‘ baaz logon ka khayal hai ke Amir Radi Allahu Anhu ka sara amal akarat ho gaya (kyunke khud apni hi talwar se in ki wafat hui). Aap Sallallahu Alaihi Wasallam ne farmaya ke jhoota hai wo shakhs jo is tarah ki baatein karta hai ‘ unhein to dohra ajr mile ga phir Aap ne apni dono ungliyon ko ek sath milaya ‘ unhon ne takleef aur mushaqqat bhi uthayi aur Allah ke raste mein jihad bhi kiya ‘ shayad hi koi Arabi ho ‘ jis ne in jaisi misal qaim ki ho. Hum se Qutaiba ne bayan kiya ‘ in se Hatim ne (bajaye «masha biha» ke) «nasha biha» naqal kiya yani koi Arab Madina mein Amir Radi Allahu Anhu jaisa nahi hua
.