Hum se Musa Bin Ismail ne bayan kiya ‘ kaha hum se Abu Awana ne bayan kiya ‘ in se Husain Bin Abdur Rahman ne ‘ in se Abu Wail Shaqiq Bin Salama ne bayan kiya ‘ in se Masrooq Bin Ajda ne bayan kiya ‘ kaha ke mujh se Umm-e-Rooman Radi Allahu Anha ne bayan kiya ‘ wo Aisha Radi Allahu Anha ki walida hain. Unhon ne bayan kiya ke mein aur Aisha Radi Allahu Anha baithi hui thin ke ek Ansari khatoon ayin aur kehne lagin ke Allah falaan, falaan ko tabah kare. Umm-e-Rooman ne poocha ke kya baat hai? Unhon ne kaha ke mera larka bhi in logon ke sath shareek ho gaya hai. Jinhon ne is tarah ki baat ki hai. Umm-e-Rooman Radi Allahu Anha ne poocha ke aakhir baat kya hai? Is par unhon ne tuhmat lagane walon ki baatein naqal kar dein. Aisha Radi Allahu Anha ne poocha: Kya Rasul Allah Sallallahu Alaihi Wasallam ne bhi ye baatein sunin hain? Unhon ne bayan kiya ke haan. Unhon ne poocha aur Abu Bakr Radi Allahu Anhu ne bhi? Unhon ne kaha ke haan ‘ unhon ne bhi. Ye sunte hi wo ghash kha kar gir parin aur jab hosh aaya to jare ke sath bukhar charha hua tha. Mein ne in par in ke kapre daal diye aur acchi tarah dhak diya. Is ke baad Rasul Allah Sallallahu Alaihi Wasallam tashreef laye aur daryaft farmaya ke unhein kya hua hai? Mein ne arz kiya: Ya Rasul Allah! Jare ke sath bukhar charh gaya hai. Nabi Kareem Sallallahu Alaihi Wasallam ne farmaya ke ghaliban is ne is tufan ki baat sun li hai. Umm-e-Rooman Radi Allahu Anha ne kaha ke ji haan. Phir Aisha Radi Allahu Anha ne baith kar kaha ke Allah ki qasam! Agar mein qasam khaoon ke mein begunaah hoon to Aap log meri tasdeeq nahi karein ge aur agar kuch kahoon tab bhi mera uzr nahi sunein ge. Meri aur Aap logon ki Yaqub Alaihis Salam aur in ke beton jaisi misal hai ke unhon ne kaha tha «wallahul musta'anu ala ma tasifun» yani ”Allah in baaton par jo tum banate ho madad karne wala hai.“ Umm-e-Rooman Radi Allahu Anha ne kaha: Nabi Kareem Sallallahu Alaihi Wasallam Aisha Radi Allahu Anha ki ye taqreer sun kar laut gaye ‘ kuch jawab nahi diya. Chunancha Allah Ta'ala ne khud in ki talafi nazil ki. Wo Nabi Kareem Sallallahu Alaihi Wasallam se kehne lagin bas mein Allah hi ka shukr ada karti hoon na Aap ka na kisi aur ka
.