Aur Surah Aal-e-Imran mein Allah Ta'ala ka farman ”Aur wo waqt yaad kijiye, jab Aap subah ko apne gharon ke pas se nikle, musalmanon ko larayi ke liye munasib thikanon par le jate hue aur Allah bara sunne wala hai, bara janne wala hai.“ Aur isi surat mein Allah Azzawajal ka farman ”Aur himmat na haaro aur gham na karo, tumhi ghalib raho ge agar tum momin ho ge. Agar tumhein koi zakham pahunch jaye to in logon ko bhi aisa hi zakham pahunch chuka hai aur hum in dinon ki ulat pher to logon ke darmiyan karte hi rehte hain, taake Allah iman lane walon ko jaan le aur tum mein se kuch ko shaheed banaye aur Allah Ta'ala zalimon ko dost nahi rakhta aur taake Allah iman lane walon ko mail kucfail se saaf kar de aur kafiron ko mita de. Kya tum is guman mein ho ke jannat mein dakhil ho jao ge, halanke abhi Allah ne tum mein se in logon ko nahi jana jinhon ne jihad kiya aur na sabr karne walon ko jana aur tum to maut ki tamanna kar rahe thay is se pehle ke is ke samne ao. So is ko ab tum ne khoob khuli aankhon se dekh liya.“ Aur Allah Ta'ala ka farman ”Aur yaqeenan tum se Allah ne sach kar dikhaya apna wada, jab ke tum unhein is ke hukm se qatl kar rahe thay, yahan tak ke jab tum khud hi kamzor par gaye aur aapas mein jhagharne lage. Hukm-e-Rasul ke bare mein aur tum ne nafarmani ki baad is ke ke Allah ne dikha diya tha jo kuch ke tum chahte thay baaz tum mein wo thay jo duniya chahte thay aur baaz tum mein aise thay jo akhirat chahte thay. Phir Allah ne tum ko in mein se pher diya taake tumhari poori azmaish kare aur Allah ne tum se darguzar ki aur Allah iman lane walon ke haq mein bara fazl wala hai.“ (Aur ayat) ”Aur jo log Allah ki rah mein mare gaye hain unhein hargiz murda mat khayal karo.“ Aakhir ayat tak
.

Hum se Ibrahim Bin Musa ne bayan kiya, hum ko Abdul Wahhab ne khabar di, unhon ne kaha hum se Khalid ne bayan kiya, un se Ikrima ne bayan kiya aur un se Abdullah Bin Abbas (Radi Allahu Anhuma) ne bayan kiya ke Nabi Kareem Sallallahu Alaihi Wasallam ne Ghazwa Uhud ke mauqe par farmaya ”Ye Jibrail Alaihis Salam hain, hathiyar band, apne ghore ki lagam thame hue“
.