Hum se Yahya Bin Bishr ne bayan kiya, kaha hum se Rooh ne bayan kiya, un se Auf ne bayan kiya, un se Muawiyah Bin Qurrah ne bayan kiya ke mujh se Abu Burdah Bin Abu Musa Ashari ne bayan kiya, unhon ne bayan kiya ke mujh se Abdullah Bin Umar Radi Allahu Anhuma ne poocha, kya tum ko maloom hai ke mere walid Umar Radi Allahu Anhu ne tumhare walid Abu Musa Radi Allahu Anhu ko kya jawab diya tha? Unhon ne kaha nahi, to Abdullah Bin Umar Radi Allahu Anhuma ne kaha ke mere walid ne tumhare walid se kaha: Ay Abu Musa! Kya tum is par razi ho ke Rasul Allah Sallallahu Alaihi Wasallam ke sath hamara Islam, aap ke sath hamari hijrat, aap ke sath hamara jihad hamare tamam amal jo hum ne aap ki zindagi mein kiye hain un ke badla mein hum apne in aamaal se najaat pa jayein jo hum ne aap ke baad kiye hain go wo naik bhi hon bas barabri par mamla khatam ho jaye. Is par aap ke walid ne mere walid se kaha Allah ki qasam! Mein is par razi nahi hoon hum ne Rasul Allah Sallallahu Alaihi Wasallam ke baad bhi jihad kiya, namazein parhein, roze rakkhe aur bahut se aamaal-e-khair kiye aur hamare hath par ek makhlooq ne Islam qabool kiya, hum to is ke sawab ki bhi umeed rakhte hain is par mere walid ne kaha (khair abhi tum samjho) lekin jahan tak mera sawal hai to is zaat ki qasam! Jis ke hath mein meri jaan hai meri khwahish hai ke Aap Sallallahu Alaihi Wasallam ki zindagi mein kiye hue hamare aamaal mehfooz rahe hon aur jitne aamaal hum ne aap ke baad kiye hain un sab se is ke badla mein hum najaat pa jayein aur barabar par mamla khatam ho jaye. Abu Burdah kehte hain is par mein ne kaha: Allah ki qasam! Aap ke walid (Umar Radi Allahu Anhu) mere walid (Abu Musa Radi Allahu Anhu) se behtar thay
.