Aur Aisha Radi Allahu Anha ne bayan kiya ke Nabi Kareem Sallallahu Alaihi Wasallam ne farmaya mujhe tumhari hijrat ki jagah (khwab mein) dikhayi gayi hai, wahan khajooron ke bagh bahut hain wo jagah do pathreele maidanon ke darmiyan hai. Chunanche jinhon ne hijrat kar li thi wo Madinah hijrat kar ke chale gaye balkay jo musalman Habshah hijrat kar gaye thay wo bhi Madinah wapas chale aaye. Is bare mein Abu Musa aur Asma Bint Umais ki riwayat Nabi Kareem Sallallahu Alaihi Wasallam se marwi hain
.

Hum se Abdullah Bin Muhammad Jafi ne bayan kiya, kaha hum se Hisham Bin Yusuf ne bayan kiya, unhein Ma'mar ne khabar di, unhein Zuhri ne kaha ke hum se Urwah Bin Zubair ne bayan kiya, unhein Ubaidullah Bin Adi Bin Khiyar ne khabar di, unhein Miswar Bin Makhramah aur Abdur Rahman Bin Aswad Bin Abdi Yaghoos in dono ne Ubaidullah Bin Adi Bin Khiyar se kaha ke tum apne mamoon (Ameer-ul-Momineen) Usman Radi Allahu Anhu se un ke bhai Walid Bin Uqbah Bin Abi Muait ke baab mein guftagu kyun nahi karte (hua ye tha ke logon ne is par bahut itiraz kiya tha jo Usman ne Walid ke sath kiya tha). Ubaidullah ne bayan kiya ke jab Usman Radi Allahu Anhu namaz parhne nikle to mein un ke raste mein khara ho gaya aur mein ne arz kiya ke mujhe aap se ek zaroorat hai, aap ko ek khair khwahana mashwara dena hai. Is par unhon ne kaha ke bhale aadmi! Tum se to mein Allah ki panah mangta hoon. Ye sun kar mein wahan se wapas chala aaya. Namaz se farigh hone ke baad mein Miswar Bin Makhramah aur Ibn Abdi Yaghoos ki khidmat mein hazir hua aur Usman Radi Allahu Anhu se jo kuch mein ne kaha tha aur unhon ne is ka jawab mujhe jo diya tha, sab mein ne bayan kar diya. In logon ne kaha tum ne apna haqq ada kar diya. Abhi mein is majlis mein baitha tha ke Usman Radi Allahu Anhu ka aadmi mere paas (bulane ke liye) aaya. In logon ne mujh se kaha tumhein Allah Ta'ala ne imtihan mein dala hai. Aakhir mein wahan se chala aur Usman Radi Allahu Anhu ki khidmat mein hazir hua. Aap ne daryaft kiya tum abhi jis khair khwahi ka zikr kar rahe thay wo kya thi? Unhon ne bayan kiya ke phir mein ne kaha Allah gawah hai phir mein ne kaha Allah Ta'ala ne Muhammad Sallallahu Alaihi Wasallam ko mab'oos farmaya aur un par apni kitab nazil farmai, aap in logon mein se thay jinhon ne Nabi Kareem Sallallahu Alaihi Wasallam ki dawat par labbaik kaha tha. Aap Nabi Kareem Sallallahu Alaihi Wasallam par iman laye do hijratein kein (ek Habshah ko aur doosri Madinah ko) aap Rasul Allah Sallallahu Alaihi Wasallam ki suhbat se faiz yab hain aur Nabi Kareem Sallallahu Alaihi Wasallam ke tariqon ko dekha hai. Baat ye hai ke Walid Bin Uqbah ke bare mein logon mein ab bahut charcha hone laga hai. Is liye aap ke liye zaroori hai ke is par (sharab noshi ki) hadd qaim karein. Usman Radi Allahu Anhu ne farmaya mere bhatije ya mere bhanje kya tum ne bhi Rasul Allah Sallallahu Alaihi Wasallam ko dekha hai? Mein ne arz kiya ke nahi. Lekin Aap Sallallahu Alaihi Wasallam ke deen ki batein is tarah mein ne hasil ki theen jo ek kunwari larki ko bhi apne parde mein maloom ho chuki hain. Unhon ne bayan kiya ke ye sun kar phir Usman Radi Allahu Anhu ne bhi Allah ko gawah kar ke farmaya: Bilashuba Allah Ta'ala ne Muhammad Sallallahu Alaihi Wasallam ko haqq ke sath mab'oos kiya aur aap par apni kitab nazil ki thi aur ye bhi theek hai ke mein in logon mein se tha jinhon ne Allah aur is ke rasool ki dawat par (ibtida hi mein) labbaik kaha tha. Nabi Kareem Sallallahu Alaihi Wasallam jo shariat le kar aaye thay mein is par iman laya aur jaisa ke tum ne kaha mein ne do hijratein kein. Mein Nabi Kareem Sallallahu Alaihi Wasallam ki suhbat se faiz yab hua aur Aap Sallallahu Alaihi Wasallam se bai'at bhi ki. Allah ki qasam! Mein ne aap ki nafarmani nahi ki aur na kabhi khiyanat ki. Aakhir Allah Ta'ala ne Aap Sallallahu Alaihi Wasallam ko wafat de di aur Abu Bakr Radi Allahu Anhu khalifa muntakhab hue. Allah ki qasam! Mein ne in ki bhi kabhi nafarmani nahi ki aur na in ke kisi mamla mein koi khiyanat ki. In ke baad Umar Radi Allahu Anhu khalifa hue mein ne in ki bhi kabhi nafarmani nahi ki aur na kabhi khiyanat ki. Is ke baad mein khalifa hua. Kya ab mera tum logon par wahi haqq nahi hai jo in ka mujh par tha? Ubaidullah ne arz kiya yaqeenan aap ka haqq hai phir unhon ne kaha phir in baton ki kya haqiqat hai jo tum logon ki taraf se pahunch rahi hain? Jahan tak tum ne Walid Bin Uqbah ke bare mein zikr kiya hai to hum in sha Allah is mamle mein is ki girift haqq ke sath karein ge. Rawi ne bayan kiya ke aakhir (gawahi ke baad) Walid Bin Uqbah ko chalees kore lagwaye gaye aur Ali Radi Allahu Anhu ko hukm diya ke kore lagayein. Ali Radi Allahu Anhu hi ne is ko kore maare thay. Is hadees ko Yunus aur Zuhri ke bhatije ne bhi Zuhri se riwayat kiya is mein Usman Radi Allahu Anhu ka qaul is tarah bayan kiya, kya tum logon par mera wahi haqq nahi hai jo in logon ka tum par tha
.