Hum se Muslim Bin Ibrahim ne bayan kiya, kaha hum se Wuhaib ne bayan kiya, kaha hum se Abdullah Bin Taoos ne bayan kiya, un se un ke walid ne aur un se Abbas Radi Allahu Anhuma ne bayan kiya ke zamana-e-jahiliyat mein log hajj ke mahinon mein umrah karna bahut bara gunah khayal karte thay. Wo Muharram ko Safar kehte. Un ke haan ye misl thi ke oont ki peeth ka zakham jab accha hone lage aur (hajiyon ke) nishanat-e-qadam mit chukein to ab umrah karne walon ka umrah jaiz hua. Ibn Abbas Radi Allahu Anhuma ne bayan kiya ke phir Rasul Allah Sallallahu Alaihi Wasallam apne ashab ke sath Zil-Hijjah ki chauthi tareekh ko hajj ka ihram bandhe hue (Makkah) tashreef laye to aap ne Sahaba ko hukm diya ke apne hajj ko umrah kar dalein (tawaf aur sayee kar ke ihram khol dein). Sahaba ne arz kiya: Ya Rasul Allah! (Is umrah aur hajj ke dauran mein) kya cheezein halal hon gi? Aap Sallallahu Alaihi Wasallam ne farmaya ke tamam cheezein! Jo ihram ke na hone ki halat mein halal theen wo sab halal ho jayein gi
.