Mujh se Ismail bin Abdullah ne bayan kiya, kaha hum se Sulaiman bin Bilal ne bayan kiya, un se Hisham bin Urwah ne, un se Urwah bin Zubair ne aur un se Nabi Kareem Sallallahu Alaihi Wa Sallam ki zauja mutahharah Aisha Radi Allahu Anha ne bayan kiya ke Nabi Kareem Sallallahu Alaihi Wa Sallam ki jab wafat hui to Abu Bakr Radi Allahu Anhu is waqt Maqam-e-Sunah mein thay. Ismail ne kaha yani awali ke ek gaon mein. Aap ki khabar sun kar Umar Radi Allahu Anhu uth kar yeh kehne lage ke Allah ki qasam Rasoolullah Sallallahu Alaihi Wa Sallam ki wafat nahi hui. Aisha Radi Allahu Anha ne kaha ke Umar Radi Allahu Anhu kaha karte thay Allah ki qasam is waqt mere dil mein yahi khayal aata tha aur mein kehta tha ke Allah Aap ko zaroor is bimari se accha kar ke uthayega aur Aap in logon ke hath aur paon kaat dein gay (jo Aap ki maut ki batein karte hain) itne mein Abu Bakr Radi Allahu Anhu tashreef le aaye aur andar ja kar Aap ki na'sh mubarak ke upar se kapra uthaya aur bosa diya aur kaha: Mere maan baap Aap par fida hon. Aap zindagi mein bhi pakeeza thay aur wafat ke baad bhi aur us zaat ki qasam jis ke hath mein meri jaan hai, Allah Ta'ala Aap par do martaba maut hergiz tari nahi karega. Is ke baad Aap bahar aaye aur Umar Radi Allahu Anhu se kehne lage, Ae qasam khane wale! Zara tammul kar. Phir jab Abu Bakr Radi Allahu Anhu ne guftagu shuru ki to Umar Radi Allahu Anhu khamosh baith gaye.