Abu Bakr Radi Allahu Anhu ne pehle Allah ki hamd-o-sana bayan ki. Phir farmaya: Logo! Dekho agar koi Muhammad (Sallallahu Alaihi Wa Sallam) ko poojta tha (yani yeh samajhta tha ke woh aadmi nahi hain, woh kabhi nahi marein gay) to ise maloom hona chahiye ke Muhammad Sallallahu Alaihi Wa Sallam ki wafat ho chuki hai aur jo shakhs Allah ki pooja karta tha to Allah hamesha zinda hai ise maut kabhi nahi aayegi. (Phir Abu Bakr Radi Allahu Anhu ne Surah al-Zumar ki yeh aayat parhi) "innaka mayyitun wa innahum mayyitun" "Ae Paighambar! Tu bhi marne wala hai aur woh bhi marein gay." Aur Allah Ta'ala ne farmaya "wa ma Muhammadun illa rasulun qad khalat min qablihir-rusul afa'in maata aw qutilan-qalabtum ala aqabikum wa man yanqalib ala aqabaihi falan yadurrallaha shaian wa sayajzillahush-shakireen" "Muhammad Sallallahu Alaihi Wa Sallam sirf ek Rasool hain. Is se pehle bhi bahut se Rasool guzar chuke hain. Pas kya agar woh wafat pa jayein ya unhein shaheed kar diya jaye to tum Islam se phir jaoge aur jo shakhs apni ediyon ke bal phir jaye to woh Allah ko koi nuqsan nahi pahuncha sakega aur Allah an-qareeb shukar guzar bandon ko badla dene wala hai." Rawi ne bayan kiya ke yeh sun kar log phoot phoot kar rone lage. Rawi ne bayan kiya ke Ansar Saqifah Bani Sa'idah mein Sa'd bin Ubadah Radi Allahu Anhu ke pas jama ho gaye aur kehne lage ke ek ameer hum mein se hoga aur ek ameer tum (Muhajireen) mein se hoga (dono mil kar hukumat karein gay) phir Abu Bakr, Umar bin Khattab aur Abu Ubaidah bin al-Jarrah Radi Allahu Anhum in ki majlis mein pahunche. Umar Radi Allahu Anhu ne guftagu karni chahi lekin Abu Bakr Radi Allahu Anhu ne un se khamosh rehne ke liye kaha. Umar Radi Allahu Anhu kaha karte thay ke Allah ki qasam mein ne aisa sirf is wajah se kiya tha ke mein ne pehle hi se ek taqreer tayyar kar li thi jo mujhe bahut pasand aayi thi phir bhi mujhe darr tha ke Abu Bakr Radi Allahu Anhu ki barabri is se bhi nahi ho sakegi. Phir Abu Bakr Radi Allahu Anhu ne nihayat balaghat ke sath baat shuru ki. Unhon ne apni taqreer mein farmaya ke hum (Quraish) umara hain aur tum (jama'at-e-Ansar) wuzara ho. Is par Hubab bin Munzhir Radi Allahu Anhu bole ke nahi Allah ki qasam hum aisa nahi hone dein gay, ek ameer hum mein se hoga aur ek ameer tum mein se hoga. Abu Bakr Radi Allahu Anhu ne farmaya ke nahi hum umara hain tum wuzara ho (wajah yeh hai ke) Quraish ke log sare Arab mein shareef khandan shumar kiye jate hain aur in ka mulk (yani Makkah) Arab ke beech mein hai to ab tum ko ikhtiyar hai ya to Umar Radi Allahu Anhu ki bai'at kar lo ya Abu Ubaidah bin al-Jarrah ki. Umar Radi Allahu Anhu ne kaha: Nahi hum Aap ki hi bai'at karein gay. Aap hamare sardar hain, hum mein sab se behtar hain aur Rasoolullah Sallallahu Alaihi Wa Sallam ke nazdeek Aap hum sab se zyada mahboob hain. Umar Radi Allahu Anhu ne in ka hath pakar liya aur in ke hath par bai'at kar li phir sab logon ne bai'at ki. Itne mein kisi ki awaz aayi ke Sa'd bin Ubadah Radi Allahu Anhu ko tum logon ne maar dala. Umar Radi Allahu Anhu ne kaha: Unhein Allah ne maar dala.