Hum se Yahya bin Salih ne bayan kiya, kaha hum se Fulaih bin Sulaiman ne, woh Saeed bin Haris se, kaha hum ne Jabir bin Abdullah se ek kapre mein namaz padhne ke baare mein poocha. To Aap ne farmaya ke main Nabi Kareem Sallallahu Alaihi Wasallam ke sath ek safar (Ghazwa Buwat) mein gaya. Ek raat main kisi zaroorat ki wajah se Aap ke paas aaya. Main ne dekha ke Aap Sallallahu Alaihi Wasallam namaz mein mashghool hain, is waqt mere badan par sirf ek hi kapra tha. Is liye main ne ise lapait liya aur Aap ke bazu mein ho kar main bhi namaz mein shareek ho gaya. Jab Aap namaz se farigh hue to daryaft farmaya Jabir is raat ke waqt kaise aaye? Main ne Aap Sallallahu Alaihi Wasallam se apni zaroorat ke mutaliq kaha. Main jab farigh ho gaya to Aap Sallallahu Alaihi Wasallam ne poocha ke yeh tum ne kya lapait rakkha tha jise main ne dekha. Main ne arz ki ke (ek hi) kapra tha (is tarah na lapait-ta to kya karta) Aap Sallallahu Alaihi Wasallam ne farmaya ke agar woh kushada ho to ise acchi tarah lapait liya kar aur agar tang ho to is ko tehband ke taur par bandh liya kar.