Hum se Umar bin Hafs ne bayan kiya ke kaha hum se mere walid Hafs bin Ghiyath ne, kaha ke hum se Aamash ne bayan kiya, kaha ke main ne Shaqeeq bin Salamah se suna, unhon ne kaha ke main Abdullah (Abdullah bin Masood) aur Abu Musa Ashari ki khidmat mein tha, Abu Musa ne poocha ke Abu Abdur Rahman! Aap ka kya khayal hai ke agar kisi ko ghusl ki hajat ho aur pani na mile to woh kya kare. Abdullah ne farmaya ke use namaz na padhni chahiye. Jab tak use pani na mil jaye. Abu Musa ne kaha ke phir Ammar ki is riwayat ka kya ho ga jab ke Nabi Kareem Sallallahu Alaihi Wasallam ne un se kaha tha ke tumhe sirf (hath aur munh ka tayammum) kafi tha. Ibn Masood Razi Allah Anhuma ne farmaya ke tum Umar Razi Allah Anhu ko nahi dekhte ke woh Ammar ki is baat par mutmain nahi hue thay. Phir Abu Musa ne kaha ke accha Ammar ki baat ko chhodo lekin is ayat ka kya jawab do ge (jis mein janabat mein tayammum karne ki wazih ijazat maujood hai) Abdullah bin Masood Razi Allah Anhuma is ka koi jawab na de sake. Sirf yeh kaha ke agar hum is ki bhi logon ko ijazat de dein to un ka haal yeh ho jaye ga ke agar kisi ko pani thanda maloom hua to use chhod diya kare ga. Aur tayammum kar liya kare ga. (Aamash kehte hain ke) main ne Shaqeeq se kaha ke goya Abdullah ne is wajah se yeh surat napasand ki thi. To unhon ne jawab diya ke haan. 104683