Kaha jata hai ke Amr bin al-Aas Razi Allah Anhu ko ek jade ki raat mein ghusl ki hajat hui. To Aap ne tayammum kar liya aur yeh ayat tilawat ki «wa la taqtulu anfusakum inna Allaha kana bikum rahima» ”Apni jaanon ko halak na karo, beshak Allah Ta’ala tum par bada meherban hai.“ Phir is ka zikr Nabi Kareem Sallallahu Alaihi Wasallam ki khidmat mein hua to Aap Sallallahu Alaihi Wasallam ne un ki koi malamat nahi farmayi. 104681

Hum se Bishr bin Khalid ne bayan kiya, kaha mujh ko Muhammad ne khabar di jo Ghundar ke naam se mashhoor hain, Shuba ke wasita se, woh Sulaiman se naqal karte hain aur woh Abu Wail se ke Abu Musa ne Abdullah bin Masood se kaha ke agar (ghusl ki hajat ho aur) pani na mile to kya namaz na padhi jaye. Abdullah ne farmaya, haan! Agar mujhe ek mahina tak bhi pani na mile to main namaz na padhoon ga. Agar is mein logon ko ijazat de di jaye to sardi maloom kar ke bhi log tayammum se namaz padh lein ge. Abu Musa kehte hain ke main ne kaha ke phir Umar Razi Allah Anhu ke samne Ammar Razi Allah Anhu ke qaul ka kya jawab ho ga. Bole ke mujhe to nahi maloom hai ke Umar Razi Allah Anhu Ammar Razi Allah Anhu ki baat se mutmain ho gaye thay. 104682