Jo (Surah Saad mein) «arkuz birajlika» bamaani «izrib» (yani apna paon zameen par maar) «yarkuzun» bamaani «yadun» (Surah Anbiya mein, yani daurte hain)

Mujh se Abdullah Bin Muhammad Jafi ne bayan kiya kaha hum se Abdur Razzaq ne bayan kiya kaha hum ko Maamar ne khabar di unhein Hammam ne aur unhein Abu Hurairah (Radi Allahu Anhu) ne ke Nabi Kareem (Sallallahu Alaihi Wasallam) ne farmaya "Ayub (Alaihis Salam) nange ghusal kar rahe thay ke sone ki tiddiyan un par girne lageen. Wo un ko apne kapre mein jama karne lage. Un ke parwardigar ne un ko pukara ke ae Ayub! Jo kuch tum dekh rahe ho (sone ki tiddiyan) kya mein ne tumhein is se be-parwah nahi kar diya hai? Unhon ne arz kiya ke sahi hai ae Rabb-ul-Izzat! Lekin teri barkat se mein kis tarah be-parwah ho sakta hoon."