Aur un ke liye apni meharbani se hum ne un ke bhai Harun (Alaihis Salam) ko Nabi banaya. Wahid tathniya aur jama sab ke liye lafz «najiyyan» bola jata hai. Surah Yusuf mein hai. «khalasu najiyyan» yani akele mein ja kar mashwara karne lage (agar «najiyyan» ka lafz mufrad ke liye istemal hua ho to) is ki jama «anjiyah» hogi. Surah Al-Mujadilah mein lafz «yatanajun» bhi isi se nikla hai

Hum se Abdullah Bin Yusuf Tanisi ne bayan kiya kaha hum se Laith Bin Saad ne bayan kiya kaha ke mujh se Aqeel ne bayan kiya un se Ibn Shihab ne unhon ne Urwah Bin Zubair se suna unhon ne bayan kiya ke Aisha (Radi Allahu Anha) ne kaha phir Nabi Kareem (Sallallahu Alaihi Wasallam) (Ghaar-e-Hira se) Umm-ul-Momineen Khadija (Radi Allahu Anha) ke pas lout aye to Aap (Sallallahu Alaihi Wasallam) ka dil dharak raha tha. Khadija (Radi Allahu Anha) Aap ko Waraqah Bin Naufal ke pas le gayeen, wo Nasrani ho gaye thay aur Injeel ko Arabi mein parhte thay. Waraqah ne poocha ke aap kya dekhte hain? Aap ne unhein bataya to unhon ne kaha ke yehi hain wo «namoos» jinhein Allah Ta'ala ne Musa (Alaihis Salam) ke pas bheja tha aur agar mein tumhare zamane tak zinda raha to mein tumhari poori madad karoon ga. «namoos» mahram-e-raaz ko kehte hain jo aise raaz se bhi aagah ho jo aadmi doosron se chupaye