(Surah Al-Hijr mein) jo farmaya "kazzaba ashab-ul-hijri" "Hijr walon ne paighambaron ko jhutlaya." Hijr Samood walon ka shehar tha lekin (Surah Al-Anam mein) jo "harsun hijrun" aaya hai wahan "hijrun" ke maane haram aur mamnoo ke hain. Arab log kehte hain "hijrun mahjoorun" yaani haram-o-mamnoo aur "hijrun" imarat ko bhi kehte hain aur jis zameen ko gher liya jaye (deewar ya baad se) isi se khana-e-kaba ke hateem ko "hijrun" kehte hain. "hijrun" "mahtoomun" se nikla hai "mahtoomun" ke maane toota hua. Pehle wo kaba ke andar tha is ko tod kar bahar kar diya is liye "mahtoomun" kehne lage) jaise "qateelun" "maqtoolun" se aur "madban" ghodi ko bhi. "hijrun" ke maane aql ke bhi hain jaise "huja" ke maane bhi aql ke hain (Surah Al-Fajr mein hai 'hal fi zalika qasamun lizi hijrin') aur "Hajr-ul-Yamama" (Hajjaj aur Yemen ke beech mein) ek maqam ka naam hai
.

Hum se Humaidi ne bayan kiya kaha hum se Sufyan Bin Uyaina ne bayan kiya kaha hum se Hisham Bin Urwah ne bayan kiya un se un ke walid ne aur un se Abdullah Bin Zama'a ne bayan kiya ke mein ne Nabi Kareem (Sallallahu Alaihi Wasallam) se suna (khutba ke dauran) Aap (Sallallahu Alaihi Wasallam) ne qaum ka zikar kiya jinhon ne ontni ko zibah kar diya tha. Aap (Sallallahu Alaihi Wasallam) ne farmaya ke (Allah ki qasam bheji hui) is (ontni) ko zibah karne wala qaum ka ek bahut hi ba-izzat aadmi (Qaidar nami) tha jaise hamare zamane mein Abu Zama'a (Aswad Bin Muttalib) hai
.