Surah Al-Kahf mein lafz "masrifan" ba-maane lautne ki jagah ke hai. Surah Al-Jinn mein lafz "sarafna" ka maane mutawajje kiya, bhej diya
.

Ibn Abbas (Radi Allahu Anhuma) ne kaha ke (Quran Majeed mein) lafz "subanun" narr saanp ke liye aaya hai baaz ne kaha, sanpon ki kai qismein hoti hai. "jaanun" jo safaid bareek ho, "afa-i" , zehar dar saanp aur "asawidu" kala naag (waghera) Surah Hud mein "akhizun binasiyatiha" se murad ye hai ke har janwar ki peshani thame hue hai. Yaani har janwar us ki milk aur us ki hukumat mein hai. Lafz "saffatin" jo Surah Al-Mulk mein hai, is ke maane apne parr phailaye hue aur isi surat mein lafz "yaqbizna" ba-maane apne bazuon ko samete hue ke hain
.

Hum se Abdullah Bin Muhammad ne bayan kiya, unhon ne kaha hum se Hisham Bin Yusuf ne bayan kiya, un se Ma'mar ne bayan kiya, un se Zuhri ne bayan kiya, un se Salim ne bayan kiya aur un se Abdullah Bin Umar (Radi Allahu Anhuma) ne ke unhon ne Nabi Kareem (Sallallahu Alaihi Wasallam) se suna. Aap (Sallallahu Alaihi Wasallam) mimbar par khutba dete hue farma rahe thay ke sanpon ko maar dala karo (khususan) un ko jin ke saron par do nuqte hote hain aur dum bareeda saanp ko bhi, kyunke dono aankh ki roshni tak khatam kar dete hain aur hamal tak gira dete hain
.