Kyun ke Allah ne (Surah Al-Anam mein) farmaya "ya mashar-al-jinni wal insi alam yatikum rusulun minkum yaqussoona alaikum ayati" "Ae jinon aur admiyo! Kya tumhare paas tumhare hi mein se rasul nahi aaye? Jo meri aayitein tum ko sunate rahe." Aakhir tak. (Quran Majeed mein Surah Al-Jinn mein) "bakhsan" ba-maane nuqsan ke hai. Mujahid ne kaha Surah Al-Saffat mein jo ye hai ke kafiron ne parwardigar aur jinnat mein nata thehraya hai, Quraish kaha karte thay ke farishte Allah Ta'ala ki betiyaan hain aur un ki maaien sardar jinon ki betiyaan hain. Allah Ta'ala ne un ke jawab mein farmaya, jin jante hain ke in kafiron ko hisab kitab dene ke liye hazir hona padega (Surah Yaaseen mein jo ye hai) "jundun muhdharoona" yaani hisab ke waqt hazir kiye jayenge
.

Hum se Qutaiba Bin Said ne bayan kiya, unhon ne kaha hum se Imam Maalik ne, un se Abdur Rahman Bin Abdullah Bin Abdur Rahman Bin Abi Sasah Ansari ne aur unhein un ke walid ne khabar di ke un se Abu Said Khudri (Radi Allahu Anhu) ne kaha mein dekhta hoon ke tum ko jangal mein reh kar bakriyaan charana bahut pasand hai. Is liye jab kabhi apni bakriyon ke sath tum kisi biyaban mein maujood ho aur (waqt hone par) namaz ke liye azan do to azan dete hue apni awaz khoob buland karo, kyunke muazzin ki awaz-e-azan ko jahan tak bhi koi insan, jin ya koi cheez bhi sune gi to Qiyamat ke din is ke liye gawahi de gi. Abu Said (Radi Allahu Anhu) ne kaha ke ye hadees mein ne Rasul Allah (Sallallahu Alaihi Wasallam) se suni thi
.